Թուրքիայի ազգային մեծ ժողովը էթնիկական խտրականության վերաբերյալ բողոք է ստացել Մարմարիսից

Հյուլյա Քարաբաղլը

Թուրքիայի հայազգի քաղաքացի Էլիզաբեթ Մարիա Բըչաքչըն էթնիկական խտրականության վերաբերյալ բողոքով դիմել է Թուրքիայի ազգային մեծ ժողովի (ԹԱՄԺ) Խնդրագրերի հանձնաժողովին: Փըչաքչըն հայտնելով, թե վտանգի է ենթարկված իր և ընտանիքի կյանքի ու գույքի ապահովությունը, նշել է, որ առևտրական կյանքում իրեն հանգիստ չտվող մի թուրք կին վաճառական հենց շուկայի մեջտեղում իրեն «անպատիվ հայ շներ» է անվանել: Ուշագրավ է, որ թեև Փըչաքչըն ոստիկանատուն է դիմել` դատախազության կողմից դատական հետապնդում սկսելու նպատակով, սակայն` ապարդյուն: Արդարադատության նախարարությունը խնդրի վերաբերյալ տեղեկություններ հայցած մեջլիսի հանձնաժողովին հաղորդել է, թե սույն դատական հայցին վերաբերող հանգամանքները դատախազության իրավասության տակ են գտնվում: Պարզվել է, որ դատախազությունն էլ իր հերթին որոշել է, թե գործում ներկայացված հանգամանքները բավարար չեն եղել` դատական հետապնդում սկսելու համար:

10 տարի է, ինչ Մարմարիսում է բնակվում

Էլիզաբեթ Մարիա Փըչաքչըի խնդրագրում տեղ են գտել իր և ընտանիքի մասին տեղեկություններ: Նա 10 տարի է, ինչ ապրում է Մարմարիսում: Թուրքիայի հայ քրիստոնյա քաղաքացի է: Ամուսնացած է Վրաստանի քաղաքացիություն ունեցող անձի հետ: Երկու զավակների մայր է: Հուշանվերներ է վաճառում 2009 թ. “Elisabeth Silver” անվան տակ իր բացած խանութում: Նմանատիպ մի խանութ է բացել նաև այն կինը, որի դեմ նա դատական բողոք է ներկայացրել:

«Անպատիվ հայ շներ»

Փըչաքչըն էթնիկ խտրականության մասին մեջլիսին հղած իր խնդրագրում հայտնել է, որ մեկ այլ խանութի տեր եղող թուրք կին անհանգստացրել է իր այցելուներին, և երբ ինքը և ամուսինը հարցրել են, թե «Ի՞նչ գործ ունես մեզ հետ», թուրք կինը հենց շուկայի մեջտեղում բղավել է` «Անպատիվ հայ շներ»: Փըչաքչըն ուշադրություն հրավիրելով այն փաստի վրա, որ սա էթնիկ հողի վրա առաջին անգամ հասցված վիրավորանքը չի եղել, ասել է, թե այդ թուրք կին վաճառականը ձգտել է իր դեմ հրահրել մյուս քաղաքացիներին:

Քսանչորս ժամ շարունակ տեսախցիկով հսկողություն

Փըչաքչըն ընդգծել է, որ այն անձը, որն իրեն հարկադրել է մեջլիս դիմել, շարունակել է հայերի դեմ ուղղված իր սադրիչ գործողությունները, և պնդելով, թե Էլիզաբեթի վրաստանցի ամուսինը` Էլվարը, իբր փախստականի կարգավիճակ ունի և անօրինական է աշխատում, պատճառ է դարձել, որ իրենք բազմիցս ներկայանան Մարմարիսի Անվտանգության տնօրինության Օտարերկրացիների գրասենյակի նախագահություն: Խնդրագրում շեշտվում է, որ թեև Էլիզաբեթ Մարիան դիմել է դատական ատյաններին, սակայն ոչ մի էական միջամտություն չի ստացել նրանցից: Խնդրագրում նաև նշվում է, թե հիշյալ անձը ստիպել է, որ իր խանութում տեղադրեն անվտանգության հետ ոչ մի կապ չունեցող մի տեսախցիկ, որով քսանչորսժամյա հսկողություն են սահմանել Էլիզաբեթ Մարիա Փըչաքչըի խանութում:

ԹԱՄԺ-ը գրել է Արդարադատության նախարարությանը

Խնդրագրերի հանձնաժողովը Փըչաքչըից հունիս ամսին ստացված խնդրագրի վերաբերյալ որոշում է կայացրել հուլիսի 31-ին, երբ պատասխան է ստացել Արդարադատության նախարարությունից: Արդարադատության նախարարությունը, ուշադրություն հրավիրելով այն փաստի վրա, որ սույն դատական հայցին վերաբերող հանգամանքները դատախազության իրավասության տակ են գտնվում, պատասխան նամակում նշել է, թե այս գործի առնչությամբ նախարարության կողմից ոչ մի բան չի արվել: Հաղորդվել է նաև, որ կասկածյալ Մ.Դ.-ի դեմ ուղղված «անձնական կյանքի գաղտնիությունը խախտելու» մեղադրանքով տարված հետաքննության արդյունքում Մարմարիսի հանրապետական դատախազությունը որոշել է, թե գործում ներկայացված հանգամանքները բավարար չեն` դատական գործ հարուցելու համար: Նախարարությունը նաև որոշում է կայացրել, ըստ որի` հայցվորի «խտրականության» վերաբերյալ մեղադրանքը նույնպես անհիմն է:

Ըստ նախարարության` ապացույցները գնահատելու իրավասությունը պատկանում է դատախազությանը

Խնդրագրերի հանձնաժողովը հուլիսի 31-ին հրապարակված որոշման մեկական օրինակ էլ ուղարկել է Էլիզաբեթ Մարիա Փըչաքչըին և վերջինիս փաստաբանին: Որոշման մեջ նշվել է. «Դատական գործ հարուցելու պահանջով պետք է հանդես գա հանրապետության համապատասխան դատախազությունը: Նախարարությունները չեն կարող միջամտել հանրապետական դատախազի` ապացույցները գնահատելու գործին:

http://t24.com.tr/haber/tbmmye-marmaristen-etnik-ayrimcilik-sikayeti/211215

Թարգմանեց Մելինե Անումյանը

Akunq.net