Թուրքիայի ներքին գործերի նախարարը կրկին հայտնվել է սկանդալում

Սկանդալային արտահայտություններով եւ քայլերով հայտնի Թուրքիայի ներքին գործերի նախարար Իդրիս Նաիմ Շահինը հայտնվել է մի նոր սկանդալի կիզակետում: Ցուցարարների դեմ օգտագործվող արցունքաբեր գազի հետ կապված նա հայտարարել է, թե գազը «բնական է եւ վնասակար չէ»: Շահինի այդ հայտարարությունը մեծ արձագանքի է արժանացել թուրքական սոցկայքերում:

Ինչպես հաղորդում է «Արմենպրես»–ը` վկայակոչելով թուրքական ԶԼՄ-ները, ցուցարարների դեմ ոստիկանության կողմից օգտագործվող արցունքաբեր գազի հետ կապված` Թուրքիայի գլխավոր ընդդիմադիր Ժողովրդահանրապետական կուսակցության պատագամավորի գրավոր հարցապնդմանն ի պատասխան` թուրք նախարարը նշել է, որ այդ գազը պարտաստվում է օրգանական նյութերից, առողջության համար վնասակար չէ եւ պնդել, թե այդ գազից մահվան դեպքեր չեն գրանցվել:

Թուրքիայի ՆԳՆ ղեկավարի այդ հայտարարությանն անմիջապես արձագանքել են Անկարայում վերջերս տեղի ունեցած ցույցի ժամանակ արցունքաբեր գազից մահացած մի երիտասարդի ծնողները եւ խորհուրդ տվել նրան` «ամեն օր շնչել այդ անվնաս գազը»: Twitter-ի օգտատերերից մեկը գրել է. «Շահինն էլ է 100 տոկոսով բնական, սակայն, ինչպես տեսնում ենք, վնասակար է»:

Թուրք նախարարի` Էրզրումում (Կարին) քաղաքացիների հետ հանդիպման ժամանակ արած` «Դե թռվռացեք, որ հավատանք, որ մեզ սիրում եք» վիրավորական արտահայտությունից զայրացած թուրքական REDHACK հակերային խումբը կոտրել է Թուրքիայի ՆԳՆ կայքը եւ թողել հետեւյալ գրությունը. «Թռվռալու հերթն այժմ քոնն է` Իդրիս: Եթե մեր տված հարկերի հաշվին օգտվում ես շքեղություններից, ուրեմն ապացուցիր, որ մեզ սիրում ես: Դե թռվռա, որ հավատանք»:

http://armenpress.am/arm/news/690483/turqiayi-nerqin-gortseri-nakharary-krkin-haytnvel-e-skandalum.html