Թուրքիայի ԱԳՆ Ահմեդ Դավութօղլուի այցերը Իրաքի հյուսիսային Էրբիլ եւ Քիրկուկ քաղաքներ դիվանագիտական սկանդալի առիթ են դարձել: Բաղդադի դժգոհության պատճառները «Գոլոս Ռոսիին» պարզաբանել է Ռուսաստանում Իրաքի նախկին դեսպան Աբաս Քունֆուդը:
Իրաքյան Քուրդիստանի նախագահ Մասուդ Բարզանիի հետ հանդիպմանը քննարկվել է իրավիճակը Սիրիայում եւ ահաբեկչության դեմ պայքարի հետ կապված հարցեր: Ահաբեկչության ներքո նա հավանաբար նկատի ուներ Քրդական աշխատավորական կուսակցության գործունեությունը: Շատ դիտորդներ այդ հանդիպումը գնահատում են որպես Անկարայի փորձ` համոզելու Քուրդիստանի առաջնորդին ազդել թուրքական, ինչպես նաեւ սիրիական քրդերի վրա:
Դիտորդները նշում են, որ Թուրքիան փորձելով հօգուտ իրեն լուծել սիրիական ճգնաժամը եւ միաժամանակ հարթել քրդական խնդիրը, վտանգավոր խաղ է սկսել: «Հիմա մեծ է անկախ քրդական պետության առաջացման վտանգը: Մերձավոր Արեւելքում, կարելի է ասել, արդեն սկսվել է էթնիկ սկզբունքով նոր սահմանների ձեւավորումը»,-նշել է Կունֆուդը: Դրա արդյունքը կարող է դառնալ մի շարք մանր պետությունների ձեւավորումը, եւ ոչ միայն Քուրդիստանի:
Այն տպավորությունն է, թե Անկարայում կորցրել են իրականության զգացողությունը: Հավանաբար Անկարան ենթադրում է, որ կարող են հաղթահարել ներկայիս մարտահրավերները, եւ առաջին հերթին հույսները դնում են ՆԱՏՕ-ի աջակցության վրա: Չի բացառվում, որ Թուրքիան մտադիր է փաստացի ընդլայնել իր սահմանները:
Սակայն այստեղ գլխավորն այն է, թե ՆԱՏՕ-ի ռազմավարներն ինչպես են տեսնում Մերձավոր Արեւելքում ճգնաժամի ավարտը, եւ ինչպիսի կոնֆիգուրացիա կունենա քրդական խնդիրն ապագայում: Թուրքիայի ղեկավարությունը տվյալ դեպքում դվանագիտական եւ քաղաքական կոպիտ սխալ է թույլ տվել, քանի որ Իրաքում դեզինտեգրացիոն գործընթացներին նպաստելը Անկարայի շահերից չի բխում:
Եթե Թուրքիան, քրդերի հետ խաղ սկսելով, ինքնուրույն քաղաքականություն է իրականացնում,վապա նրա հարեւաններն արդեն պետք է մտածեն նրա իրական նպատակների մասին: Եթե Թուրքիայի քաղաքականությունը ՆԱՏՕ-ի կուրսի շարունակությունն է, ապա տեղին է, որ առաջին հերթին Անկարան մտածի այդ մասին:
Leave a Reply