Ասորիներին մերժել են մայրենի լեզվով մանկապարտեզ բացել

«Վաթան» թերթը տեղեկացնում է, որ Ասորական համայնքը, որը հանրապետության ողջ պատմության ընթացքում դպրոց բացելու դիմում չի ներկայացրել, առաջին անգամ Ստամբուլում իրենց  5 հազարամյա լեզուն երեխաներին սովորացնելու համար մանկապարտեզ բացելու թույլտվություն ստանալու համար դիմել է Ազգային կրթության նախարարությանը: Դիմումը մերժվել է հետևյալ հիմնավորմամբ. «Դուք փոքրամասնություն չեք, հիմնական տարրն եք: Քանի որ փոքրամասնություն չեք, չեք կարող օտար լեզվով կրթություն կազմակերպել»: Համայնքն այս մասին հայտնել է Արդարություն և զարգացում կուսակցության նախագահ, փոխվարչապետ Հյուսեին Չելիքին: Չելիքը ասորիներին հուսադրել է. «Կառավարությունը այս պահանջը կբավարարի, մինչև այսօր կառուցողական ենք եղել, այսուհետ ևս նման դիրքորոշում ենք ունենալու: Պատրաստ ենք լսելու փոքրամասնությունների վաքֆերի պահանջները»:

Ասորական համայնքի ներկայացուցիչ Սաիդ Սուսին տեղի ունեցածի մասին ասել է. «Որպես Բեյօղլուի ասորական եկեղեցու հիմնադրամ` մտածեցինք բացել մանկապարտեզ, որտեղ համայնքի անդամ երեխաներին կսովորացնենք նաև ասորերեն: Հունիսի 6-ին Կրթության նախարարության Ստամբուլի նահանգային վարչությանը գրավոր դիմում ներկայացրեցինք: Հունիսի 26-ին պատասխան ստացանք, որտեղ ասվում է`«Դուք փոքրամասնություն չեք, հիմնական տարրն եք: Քանի որ փոքրամասնություն չեք, չեք կարող մանկապարտեզում, որը ցանկանում եք բացել, օտար լեզվով կրթություն կազմակերպել: Քանի որ թուրք քաղաքացիները բացի թուրքերենից այլ մայրենի լեզու չունեն, այլ լեզու չեք կարող սովորացնել»: Այս մերժումից հետո որպես համայնք շատ հուսահատվեցինք, սակայն անցյալ շաբաթ ազգային փոքրամասնությունների կազմակերպած իֆթարի ժամանակ այս մասին հայտնեցի Հյուսեին Չելիքին, ով ասաց. «Ինչպե՞ս կլինի, որ մարդ ցանկանա իր երեխային իր մայրենի լեզուն սովորացնի, սակայն մեր կազմակերպություններն ասեն «ոչ»: Սա ընդունելի չէ: Կառավարությունը այս պահանջը կբավարարի, պատրաստ ենք լսելու փոքրամասնությունների վաքֆերի պահանջները»: Խնդիրը առաջիկայում կկարգավորվի, կարծում եմ` Նահանգային կրթության վարչությունը մեր պահանջը սխալ է մեկնաբանել»:

Թուրքիայում 25 հազարի հասնող ասորական ուղղափառ համայնքի 85 տոկոսը բնակվում է Ստամբուլում: Բնակչության ճնշող մեծամասնությունը ապրում է Բաքըր գյուղ, Ֆլորյա, Յեշիլ գյուղ եռանկյունում: Սուսին երեխաներին մայրենի լեզուն սովորացնելու պահանջն այսպես է մեկնաբանում. «Մեր լեզուն` ասորերենը, 5 հազար տարվա պատմություն ունի: Արամեացիները քրիստոնեություն ընդունելուց հետո այս լեզուն կոչել են ասորերեն: 5 հազարամյա  մեր լեզուն չենք կարողնում մեր երեխաներին սովորացնել: Անհետացման ուղին բռնած լեզու է: Մեր պահանջն է` Կրթության նախարարության մանկապարտեզների համար սահմանված կարգով բացել մանկապարտեզ, որտեղ հավելյալ շաբաթվա որոշ օրերի մի քանի ժամ մեր երեխաներին սովորացնենք այս լեզուն, որպեսզի սերունդներին փոխանցնեն և կենդանի պահեն լեզուն: Եթե թույլտվություն լինի, մանկապարտեզը կբացենք կամ Բաքըր գյուղում կամ էլ Յեշիլ գյուղում: Ըստ մեր համայնքի պահանջների` մանկապարտեզ 100-150 երեխա կհաճախի: Այս մանկապարտեզը մեզ համար առաջին քայլը կլինի, որից հետո կպահանջենք բացել նաև նախակրթարան  և վարժարան, սակայն նախ լուծենք մանկապարտեզի հարցը: Մեր գլխավոր նպատակը մեր երեխաներին ասորերեն սովորացնելն ու մեր լեզուն կորստից փրկելն է: Մանկապարտեզը եկամտի աղբյուր կծառայի նաև հիմնադրամի համար: Եկամուտը կարիքավոր աշակերտների համար կրթաթոշակ կծառայի: Օսմանյան շրջանում բազմաթիվ կրթական կազմակերպություններ ունեինք: Հավանաբար այս պահանջը հանրապետության շրջանում մեր առաջին պահանջն է: Հուսով սպասում ենք թույլտվությանը»:

Akunq.net