Ռուսաստանը պատրաստվում է հետեւից հարվածել Թուրքիային. Գուլուզադե

Ադրբեջանի նախկին նախագահի նախկին խորհրդական, քաղաքագետ Վաաֆա Գուլուզադեն նշելով, որ Ռուսաստանը Թուրքիայի վաղեմի թշնամին է, հայտարարել է, որ Մոսկվան պատրաստվում է հետեւից հարվածել Թուրքիային: Ինչպես հաղորդում է «Արմենպրես»–ը` վկայակոչելով ադրբեջանական «Ազադլըգ» թերթը, Ադրբեջանի հակառուսական խոսափող Գուլուզադեն Թուրքիայում քրդերի ազատագրական պայքարի 28-ամյա տարելիցին նվիրված Մոսկվայում կազմակերպված մեծ համերգի կապակցությամբ ասել է, որ այդ համերգը կազմակերպել է «Քրդստանի աշխատավորական կուսակցություն» (PKK) «ահաբեկչական» կազմակերպությունը:

Գուլուզադեն ոչ ավել, ոչ պակաս, հայտարարել է, թե «այդ համերգի կազմակերպիչը PKK-ի Ռուսաստանի բաժանմունքն է»: «Մոսկվան պաշտոնապես թույլատրել է այդ համերգը: Թուրքիայի համառ պահանջներին հակառակ` Ռուսաստանը հրաժարվում է PKK-ն ահաբեկչական կազմակերպություն ճանաչել` հիմնավորելով դա այն բանով, որ կազմակերպությունն իր տարածքում որեւէ ահաբեկչական հետք չունի: Համերգի հետ կապված Ռուսաստանի այդ ժեստը լրացուցիչ լարվածություն կստեղծի երկու երկրների հարաբերություններում», -ասել է նա:

Գուլուզադեի կարծիքով` PKK-ի հետ լավ հարաբերություններով Ռուսաստանն աշխատում է վրեժ լուծել Թուրքիայից այն բանի համար, որ Սիրիայի հարցում Անկարան չի կանգնել Մոսկվայի կողքին եւ դեմ է Բաշար Ասադի վարչակարգին:

«Թուրքիան պետք է իմանա, որ Ռուսաստանն ամեն պահի պատրաստ է հարված հասցնել իրեն հետեւից: Ժամանակին PKK-ն ստեղծողներից մեկն էլ Ռուսաստանն է եղել», -ասել է ադրբեջանցի քաղաքագետը:

Գուլուզադեն մոռացել է նշել, որ ընդամենը մի քանի ամիս առաջ Բաշար Ասադին եղբայր անվանող Թուրքիայի վարչապետ Ռեջեբ Թայիփ Էրդողանն այժմ նրան թիվ մեկ թշնամի է համարում իրեն, քանի որ դա պահանջում են նրանից արեւմտյան գերտերությունները: 

http://armenpress.am/arm/news/690452/rusastany-patrastvum-e-hetevic-harvatsel-turqiayin.html