Թուրքիայի Ազգային կրթության նախարարության արխիվում գտնել են Դերսիմի կորած աղջիկների գրանցումները

Ինչպես հայտնում է «Միլլիյեթ» թերթը, Թուրքիայի Ազգային մեծ ժողովի խնդրագրերի հանձնաժողովի կազմում ստեղծված Դերսիմի ենթահանձնաժողովը, գնալով Դերսիմի կորուսյալ աղջիկներից մեկի` Սուլթան Քուլալթի պատմության հետքերով, Ազգային կրթության նախարարության արխիվում գտել է գիշերօթիկ շրջանային նախակրթարանի սանուհիների հավաքած գրանցումները, որոնք բազմաթիվ դերսիմցի աղջիկների համար հույսի նշույլ կդառնան:

Տարիներ շարունակ քույրերին փնտրող Քուլալփը դիմել է Դեսիմի ենթահանձնաժողովին. իր պատմությունը պատմելուն պես սկսվել են ուսումնասիրությունները: Ենթահանձնաժողովը Քուլալփի հայտնած տեղեկությունների լույսի ներքո Ազգային կրթության նախարարությունից պահանջել է այդ ժամանակաշրջանի դպրոցների վերաբերյալ արխիվային փաստաթղթերը: ԱԿՆ-ի ներկայացրած փաստաթղթերում եղել են Սըդըքա Այարի տնօրինած Էլյազիգի գիշերօթիկ դպրոցի գրանցումները:

Իրավասուները հայտնել են, որ հանձնաժողովի ձեռքի տակ եղած փաստաթղթերը օգնելու են հասկանալ համակարգը, պատասխան են տալու այն հարցերին, թե ինչու են այդ ժամանակ հավաքել աղջիկներին, ինչու են որդեգրման հանձնել զինվորականներին, ինչպես նաև տեղեկություն են տալու նրանց հետագա ճակատագրերի մասին: Փաստաթղթերը նաև հույսի նշույլ են այն աղջիկների համար, ովքեր Սուլթանի նման ցանկանում են գտնել իրենց ընտանիքներին:

Երբ 1931 թ. ծնված Սուլթան Քուլալփը 6 տարեկան է եղել, հողագործությամբ զբաղվող նրա հորը` Մեհմեդ Ալի աղային զինվորականները տարել են: Այդ ընթացքում զինվորականնները, մատնանշելով Սուլթանին և քույրերին, հորը հարցրել են, թե ովքեր են նրանք: Հոր պատասխանը, թե հարևանի երեխաներն են, փրկել է աղջիկների կյանքը: Մի քանի օր անց լուր են ստացել, որ Մազկերտի Գյավուր այգում Մեհմեդ Ալի աղան և նրա հետ տարված դերսիմցիները գնդակահարվել են: Սուլթանին և երեք քույրերին նրանց բարեկամը հանձնել է Սըդըքա Ավարի խնամակալությանը: Սուլթանը Էլյազիգի գիշերօթիկ դպրոցում կրթություն է ստացել 120 որբ աղջկա հետ: Դպրոցն ավարտելուց հետո Դերսիմ գնացած Սուլթանը այլևս լուր չի կարողացել ստանալ իր երկու քույրերից:

Akunq.net