Ստամբուլում հարձակվել են Ուլուդերեի համար կատարված «արդարության համար իֆթարի ժամանակը» երթի մասնակիցների վրա

Ինչպես հայտնում է «Թարաֆ» թերթը, 5-10 հոգուց բաղկացած ագրեսորների խումբը, բացելով թուրքական դրոշ և զենք կիրառելով, փորձել է խանգարել «Մազլումդեր»-ի Ստամբուլի մասնաճյուղի կազմակերպած Ուլուդերեի Ռոբոսկիի սպանությունների համար «Արդարության համար իֆթարի ժամանակը» ջահերով երթը,: Ընդհարման ժամանակ մարդկային կորուստներ չեն եղել:

«Մազլումդեր»-ի Ստամբուլի մասնաճյուղի նախագահ Ջյունեյթ Սարըյաշարը հարձակման մասին պատմել է «Timetürk»-ին:

«Մազլումդեր»-ի Ռոբոսկիի կոտորածի համար «արդարության» պահանջով Ֆաթիհ մզկիթի բակում կազմակերպած իֆթարի ընթրիքի ժամանակ զինված հարձակում է եղել: Թուրքական դրոշը բացած խումբը «Մազլումդեր»-ի անդամների վրա զենք է պահել: Երբ «Մազլումդեր»-ի անդամները պարզել են «Ումմայի ճանապարհը Քրդստանո՞վ է անցնում» պաստառները, ագրեսորները վանկարկել են` «Այստեղ Ֆաթիհն է, չեք կարող Քրդստան բառն օգտագործել»: Ոստիկանությունը «Մազլումդեր»-ի անդամներին ասել է. «Ձեր անվտանգությունը, հնարավոր է, չկարողանանք ապահովել»: Ֆաթիհ մզկիթի բակում ագրեսորների խումբը բեյսբոլի մականներով և խոհանոցային դանակներով հարձակվել է պաստառների վրա: Անվտանգության ուժերը դեպքին միջամտել են միայն այն ժամանակ, երբ ագրեսորների խումբը փախել է: Այնուհետև «Մազլումդեր»-ի անդամները ջահերով քայլել են դեպի Սարաչհանե զբոսայգի:  

Ուշագրավ է, որ ոստիկանությունը «Մազլումդեր»-ի անդամներին ասել է. «Արագ քայլեք, քանի որ իֆթարի ժամ է, բավական թվով անվտանգության աշխատակիցներ չունենք, հնարավոր է` չկարողանանք ապահովել ձեր անվտանգությունը»:

Երթի մասակիցները «Մարդասպան պետությունը պատասխան է տալու», «Մարդասպան Թուրքիայի պաշտպանության ուժերը պատասխան են տալու» լոզունգներով քայլել են Սարաչհանե զբոսայգի, որտեղ տեղի ունեցած մամլո ասուլիսին հանդես է եկել «Մազլումդեր»-ի արտաքին հարաբերությունների պատասխանատու Աբդուրահման Բաբաջանը: Բաբաջանը նախքան ասուլիսը քննադատել է իրենց նկատմամբ կատարած հարձակումը, այնուհետև ասել է, որ անցյալ շաբաթ «արդարության համար իֆթարի ժամանակը» կոնցեպտով Յըլդըզ մզկիթից մինչև Բարբարոսպուրակ, այնուհետև մինչև Բեշիկթաշի հրապարակ քայլել են` Սիրիայի համար արդարություն պահանջելով, այս շաբաթ էլ` Ուլուդերեի համար: Բաբաջանը ասելով, թե 35 տարի շարունակվող պատերազմի պատճառով և’ թուրք ժողովուրդը, և’ քուրդ ժողովուրդը մեծ տառապանքներ են կրել, պահանջել է պահ առաջ վերջ դնել տառապանքներին: Բաբաջանը նշել է, որ շարունակելու են պահանջել անարդարացի սպանված 34 հոգու իրավունքները: 

Հարձակման ենթարկված «Մազլումդեր»-ի անդամներ Մուհամեդ Զեքի Չիչեքը, Սալիհ Ալփասլանը և Հյուդա Քայան, գնալով Ֆաթիհի անվտանգության բաժին, հարձակվողների դեմ ցուցմունք են տվել:

«Մազլումդեր»-ի Ստամբուլի մասնաճյուղի նախագահ Գյունեյթ Սարըյաշարը նշել է. «Արդարության համար իֆթարի ժամանակը» կոնցեպտով երկշաբաթյա ծրագիր կազմակերպեցինք… Ռոբոսկիի կոտորածի համար կազմակերպված այս շաբաթվա երթի ժամանակ մեր մասնակիցներից մեկի ձեռքին «Ումմայի ճանապարհը Քրդստանո՞վ է անցնում» լոզունգով պաստառ կար: Մենք տակավին նոր էինք սկսել քայլերթի շարքերը կազմակերպել, երբ 5-10 հոգանոց խումբը եկավ և հարձակվեց գետնին դրված պաստառների վրա: Սկսեցին գոռալ, թե ձեզ թույլ չենք տա այստեղ ապրել, ռադ եղեք, գնացեք: Ժողովրդի մեջ աղմուկ բարձրացավ: Նրանցից մեկը ատրճանակ հանեց, մնացածները` բեյսբոլի մականը, խոհանոցի դանակը: Մենք անմիջապես մեր ընկերներից պահանջեցինք հանգստություն պահպանել և պաստառները հավաքել:

Այդ ընթացքում մեր ընկերներից մի քանիսը, այդ թվում նաև` տիկին Հյուդա Քայան, հարվածի հետևանքով գետնին ընկան: Ֆաթիհ մզկիթից անմիջապես ոստիկանություն կանչեցինք: Մեզ վրա հարձակված խումբն անմիջապես փախավ: Ոստիկանությունը մեզ ասաց, որ երթի դուրս չգանք, սակայն մենք առարկեցինք` ասելով, որ արագ կքայլենք: Քայլեցինք մինչև Սարաչհանեի այգի: Դեպքի ժամանակ ոչ ոք չի ձերբակալվել: Մեր ընկերներից ոմանք հարվածներ են ստացել, սակայն լուրջ մարմնական վնասվածքներ չունեն: Մենք հիմա ավարտեցինք մեր քայլերթը և բաժանվում ենք»:

Ջյունեթ Սարըյաշարը նաև հավելել է, որ այս երթն իրականցրել են 8 հասարակական կազմակերպության հետ միասին:

Akunq.net