Թուրք լրագրողը Թուրքիայի ՆԳ նախարար Շահինին համեմատել է Գեբելսի հետ

Մուսոլինիի ոգով  հայտարարություններով հանդես եկող Թուրքիայի ներքին գործերի նախարար Իդրիս Նաիմ Շահինը Գեբելսից ոգեւորվելու չափ պարզամիտ է: Ինչպես հաղորդում է «Արմենպրես»–ը, այսպես է սկսել թուրքական «Ռադիկալ» թերթում «Այսօր Գեբելսները հեշտ չեն մեծանում» վերնագրով հրապարակած հոդվածը թերթի թղթակից Օզգյուր Մումջուն` անդրադառնալով թուրք գլխավոր ոստիկանապետի խայտառակ պաշտոնեական գործունեությանը:

«Իդրիս Նաիմ Շահինն օրերս հպարտությամբ հայտարարեց, որ Թուրքիայի բանտերում 2824 դատապարտյալ ուսանողներ կան: Թուրք-իսլամական համադրությամբ Շահինը նրանց բոլորին ահաբեկիչներ է անվանում: Այդ թիվն այնքան մեծ է, որ հավասար է ամբողջ աշխարհում եղած ահաբեկիչների կեսին: Շահինն իր նախարարական գործունեությունն սկսել է «անտակտ մարդ», «վատ հումորով» եւ «ստանդարտ քաղաքական գործիչ» պիտակներով, իսկ թուրքական մամուլը նրան դիմավորել է` «Տես, այդ կեղտոտը դու ես» մոտեցումով: Իսկ հետո Մուսոլինիի` 1934-ի մի հոդվածից նրա արտատպած` «Պետական կյանքը ես եմ» հայտարարությամբ գործն ավելի լրջացավ: Պարոն նախարարը հայտարարել էր, թե ահաբեկչությունն ինքը կարող է գտնել անգամ կտավում, գրքում, բանաստեղծության մեջ կամ էլ հոդվածում: Հետո էլ զարմանում ենք, թե այդ ինչպես եղավ, որ աշխարհի ահաբեկիչների կեսը Թուրքիայում են», -գրում է Մումջուն:

«Ռադիկալ»-ի թղթակիցը խորհուրդ է տալիս Թուրքիայի ՆԳ նախարարի կողմից ահաբեկչական որակված գրքերը, կտավները, բանաստեղծությունները, երգերը հանրության անարգանքին արժանացնելու համար ցուցադրել թանգարանում, իսկ դա անելու համար թուրք նախարարին առաջարկում է օգտվել Գերմանիայի օրինակից, երբ 1937-ին ամբողջ երկրում էսեսականները հրապարակավ այրեցին առաջադեմ գրքերն ու արվեստի ստեղծագործությունները:

«Համոզված եմ` Մուսոլինիին հոգեհարազատ հայտարարություններով հանդես եկող պարոն Շահինը Գեբելսից ոգեւորվելու չափ պարզամիտ է: Եթե ուզի, կարող է այս հոդվածը եւս ցուցադրել այդ թանգարանում: Դրա համար փող չեմ պահանջի: Իշխող Արդարություն եւ զարգացում կուսակցության իշխանության գալու ժամանակ 10 տարեկան երեխաների` այսօր 20 տարեկանում նրանց սպանության համար պատասխանատու այդ ստեղծագործությունները պետք է անմիջապես ցուցադրվեն», -հեգնել է «Ռադիկալ»-ի թղթակիցը:

http://armenpress.am/arm/news/689941/turq-lragroxy-turqiayi-ng-nakharar—-shahinin-hamematel.html