Թուրքիայի համար կռվող հայի ծնողներին կոտորեցին Կեսարիայում. «Սաբահ»

Թուրքիայի համար կռվող հայի ծնողներին կոտորեցին Կեսարիայում: Այս մասին թուրքական «Սաբահ» թերթում գրում է սյունակագիր Էնգին Արդըչը` անդրադառնալով 1915-ին Չանաքքալեի համար մղված մարտերին: «Արմենպրես»–ի հաղորդմամբ` հեղինակը նշում է, որ միլիոնավոր մարդիկ Չանաքքալեի գրավումը թուրքական հաղթանակ են համարում, չնայած այդ ժամանակ կռվում գերմանացի սպաներ էլ են եղել: «Թուրքական զինված ուժերի գլխավոր շտաբի պետը գերմանացի է եղել, բայց հաղթանակը թուրքական է համարվել: Հրամանատարը` գերմանացի, հաղթանակը` թուրքական»,- գրում է թերթը: 1915-ին Չանաքքալեի համար մարտում կռվել են նաեւ արաբներ, եզդիներ, որոնց Ջեմալ փաշան ուղարկել էր Սիրիայից:

«Չանաքքալեում հերոսաբար կռվել է նաեւ մի քանի անգլիական նավեր խորտակած հրետանու հրամանատար հայ սպա Սարգիս Թորոսյանը: Նա անգամ պարգեւատրվել է օսմանյան բանակի շքանշանով, կրտսեր լեյտենանտից հասել է մինչեւ կապիտան: Հենց այն օրերին` 1915-ի ամռան սկզբին, երբ նա Չանաքքալեում կռվում էր Թուրքիայի համար, իր ծննդավայր Կայսերիի (Կեսարիա)  Էվերեք (այժմ` Դեվելի) թաղամասում սպանում էին նրա ծնողներին: 1917-ին նա վերադառնում է Կայսերի, որտեղ ոչ մի հարազատի չի գտնում: Ուղեւորվում է Սիրիա (Դեր Զոր)` հարազատներին գտնելու համար, որտեղ գտնում է քրոջը` Պայծառին: Նա քրոջը գտնում է այնպիսի վիճակում, որ ընբոստանում է Թուրքիայի դեմ եւ 1918-ին միավորվում արաբ ապստամբներին: «Չանաքքալեի հերոս Թորոսյանը, ահա քեզ հայրենիքի դավաճան», – ասում էին նրա հորն ու մորը սպանողները: Դրանից հետո, արտաքսված շատ հայերի նման նա մեկնել է ԱՄՆ: 1947-ին նա գրել է իր հուշերը` «Չանաքքալեից մինչեւ պաղեստինյան ճակատ», որն արդեն թարգմանված է թուրքերեն: Թուրքիայում այդ գիրքը հրատարակել է պրոֆեսոր Այհան Աքթարը, ով լավ նախաբան է գրել»,- ավելացնում է  Էնգին Արդըչը:

http://armenpress.am/arm/news/689983/turqiayi-hamar-krvox-hayi-tsnoxnerin-kotorecin-kesariayum.html