Թուրք-սիրիական հակասություններում խճճված Անկարան ստիպված է բուռն պայքար ծավալել քուրդ ապստամբների դեմ` իր երկրի սահաններից ներս։ Կիրակի օրը Հաքքյարի նահանգում, Չուքուրջա բնակավայրի մոտ, քուրդ զինյալների հարձակման արդյունքում սպանվել է 8 թուրք զինվորական:
Մինչդեռ «Քուրդիստանի աշխատավորական կուսակցություն» ռազմական թեւի` Ժողովրդի պաշտպանության ուժերի տարածած հայտարարության մեջ նշվել է, որ այդ ընթացքում 19 տարբեր կետերից համաժամանակյա հարձակման են ենթարկել թուրքական զինվորական տարբեր ստորաբաժանումներ, որի ընթացքում սպանվել է թուրք շուրջ 100 զինվորական, գերի ընկել գյուղի 9 պահապան, որոնք ավելի ուշ ազատ են արձակել:
Սա գնահատվել է որպես թուրքական անվտանգության ուժերի դեմ հուլիսի 23-ից սկսված հեղափոխական ռազմական գործողությունների առաջին փուլի հաջող ավարտ։ Հաղորդվում է, որ քուրդ զինյալներին հաջողվել է շուրջ 40 րոպեով գրավել 170 զինվորական ունեցող Գեչիմլի զորակայանը եւ բռնագրավել այնտեղ եղած 20 միավոր զինատեսակ:
Թուրքական զինված ուժերի դեմ գործողությունների ընթացքում քուրդ զինյալները տվել են 7 զոհ: Իսկ թուրքական մամուլում քուրդ զինյալների հաջողությունները փորձում են բացատրել Սիրիայի նախագահ Բաշար Ասադի կողմից PKK-ին զինամթերքի տեսքով ցուցաբերված աջակցությամբ:
Leave a Reply