«Առավոտյան ժամը 4-4:30-ից մենք, որոշ մարդիկ ծնկաչոք, որոշ մարդիկ էլ մեծ դժվարությամբ, բարձրացանք Մարութա սարը”,- պատմեց «Մարաթուկ» ազգագրական երգի-պարի համույթի գեղարվեստական ղեկավար Երվանդ Թորոսյանը։
Դեռեւս անցյալ տարի Արեւմտյան Հայաստան կատարած այցելությունից հետո «Մարաթուկ» անսամբլն իր առջեւ նպատակ էր դրել հաջորդ տարի անպայման վերադառնալ եւ բարձրանալ այն խորհրդանշական լեռը, որի անունը կրում է համույթը: Այժմ արդեն իրենց երազանքն իրականություն դարձրած մարաթուկցիները պատմում են, որ ուխտագնացության ժամանակ իրենց են միացել ոչ միայն հայեր՝ աշխարհի տարբեր անկյուններից, այլեւ` օտարազգիներ:
«Շնորհակալ ենք Աստծուց եւ մեր ղեկավարներից, ովքեր կարողացան կապեր ստեղծել մեր հովանավորների հետ եւ վերջապես իրականացնել մեր իղձը` բարձրանալ Մարութա սարի Սուրբ Աստվածածին վանքը, վառել մոմեր եւ Աստծուն ասել, որ մենք կատարեցինք նաեւ մեր Մգրոյի երազանքը»,- ասաց «Մարաթուկ» ազգագրական երգի-պարի համույթի մենակատար Ռադիկ Ալավերդյանը:
«Հիմնադրման իսկ օրվանից հիմնադիր Մգրո Սարգսյանը երազում էր, որ դեռ էն ժամանակ, երբ սահմանները բաց չէին, անպայման Մշո խըռ, յարխուշտա եւ մեր հայկական քոչարին պիտի պարեն Մարաթուկ լեռան լանջին”,- հիշեց “Մարաթուկ” ազգագրական երգի-պարի համույթի տնօրեն Հասմիկ Բաղդասարյանը։
Եւ այդպես էլ եղավ. «Մարաթուկ» համույթի անդամները, հասնելով համանուն լեռան լանջին, պարեցին հայկական քոչարին, յարխուշտան, պայքարի ոգով երգեցին ազգային-հեղափոխական երգեր` բոլորին ներկայացնելով հայկական մշակույթի մնայուն արժեքները:
«Ամենամեծ տպավորությունն այն էր, որ երբ հասանք Մարաթուկի լանջին, արդեն գիշեր էր, եւ ճաշելուց հետո, բոլորը միահամուռ ձեւով հավաքվեցին լանջին, եւ սկսվեց հայկական երգն ու պարը: Մարաթուկ սարն էլ կարծես վեհությամբ կանգնել, հավաքել էր իր ժողովրդին, ովքեր երգում ու պարում էին միայն հայերեն»,- պատմեց մենակատար Դավիթ Հակոբյանը:
Իսկ համույթի մենակատար Ջուլիետային ամենաշատը տպավորել էր այն հանգամանքը, որ իրենց պարը վարակել էր բոլորին, եւ ներկաներն իրենց հետ միասին պարել են հայակական քոչարի եւ յարխուշտա:
«Մարաթուկցիներն» անկեղծանում են` հույս ունեն, որ մի օր էլ անպայման հայկական երգը նույն տարածքներում կթնդա ոչ իբրեւ այցելու եկած հայորդիների շուրթերից։
Leave a Reply