Թուրքերը բողոքում են, որ Հայաստանի քարհանքների պայթեցումները վնասում են Անիի կանգնուն մնացած եկեղեցիները

«Ներկայում Թուրքիայի տարածքում գտնվող Հայաստանի պատմական մայրաքաղաք Անիի կանգուն մնացած եկեղեցիներն ու մյուս շինությունները վնասվում են Ախուրյանի կիրճից այն կողմ (Հայաստանի Հանրապետության տարածքում-խմբ.) գտնվող քարհանքների շրջանում իրականացվող պայթյուններից»: Այս մասին ահազանգում են թուրքական լրատվամիջոցները։

Թուրքական Haberler-ը գրում է, թե Անիի ավերակներ այցելող թե Թուրքիայի քաղաքացիները, թե արտասահմանցի զբոսաշրջիկները բողոքում են Հայաստանի տարածքում գործող քարհանքներից, որտեղ իրականացվող պայթյուններից վնասվում են Անիի կանգուն մնացած արժեքները։

Զբոսաշրջիկները պահանջում են, որ որպեսզի թուրքական իշխանությունները կարողանան հայկական իշխանությունների հետ համաձայնության գալ` հանուն Անիի փակել սահմանին գտնվող քարհանքները։

Խնդրի առնչությամբ դիմեցինք հուշարձանագետ Սամվել Կարապետյանին: Նա NEWS.am-ի թղթակցի հետ զրույցում նշեց, որ Հայաստանի քարհանքների պայթեցումները շատ մեծ վնաս են հասցրել Անիի կանգուն մնացած եկեղեցիներին: Եւ երբ այդ թեմայի շուրջ մի քանի տարի առաջ աղմուկ էր բարձրացվել, տարիներ պահանջվեց, որ պայթեցումները դադարեցվեն, մասնավորապես` 2005-2006 թվականներից հանքը շահագործվում է առանց պայթեցումների:  «2000թ., երբ ես ինքս Անի քաղաքում էի, երբ շրջում էինք քաղաքում, 1,5 ժամվա ընթացքում երկու պայթյուն եղավ, եւ դուք չեք կարող երեւակայել, թե դա ինչ ցնցում  էր Անի քաղաքում: Երբ մարդ հիշում է, որ Անի քաղաքում հնագիտական պեղումներ կատարելիս Նիկողայոս Մառն արգելել էր նույնիսկ որսորդական տարածքում մեկ  կրակոց արձակել միայն մի պատճառով` հաշվի առնելով ձայնը»,- նշեց նա:

Հուշարձանագետի կարծիքով`  եթե նորից նույն խնդիրը արծարծում են թուրքական լրատվամիջոցները, ապա այստեղ երկու տարբերակ կա. կամ դա սուտ է, եւ թուրքերը շահարկում են տարիներ առաջ տեղի ունեցած մի խնդիր, կամ էլ «մեր անհոգի, շահամոլ արդյունաբերողները նորից են սկսել վնասել Անին»: Նա տեղեկություն չուներ` արդյոք պայթեցումներ իրականում կա՞ն, թե՞ ոչ:

Սամվել Կարապետյանի փոխանցմամբ`  այդ քարհանքները պատկանում են «ազգի ընտրյալներին»: Քարհանքների` պատգամավորներին պատկանելու մասին հուշարձանագետին հայտնել էին տեղի բնակիչները:

http://news.am/arm/news/116034.html