Լեհ փորձագետ. «Թուրքիայի անդամակցությունը Եվրոմիությանը անհնար է»

Թուրքիայում հասկանում են, որ Եվրոպական Միության անդամ դառնալ չեն կարող, այդ պատճառով էլ իրենց թույլ են տալիս դեմարշ անել: Այս մասին NEWS.am-ի թղթակցի հետ զրույցում հայտնել է Աշխարհաքաղաքական վերլուծությունների եվրոպական կենտրոնի փորձագետ Մաթեուշ Պիսկորսկին` անդրադառնալով Թուրքիա-ԵՄ հարաբերությունների սառեցման Անկարայի նախաձեռնությանը, այն բանից հետո, երբ Եվրոմիության նախագահությունն անցել է Կիպրոսին: Նրա խոսքերով` Թուրքիայի քաղաքական վերնախավն արդեն հրաժարվել է ԵՄ-ին անդամակցելու մտքից:

«Սրա վրա ազդում են մի շարք գործոններ, այդ թվում` մի շարք Եվրոպական երկրների կոշտ դիրքորոշումը այս հարցում, օրինակ` Գերմանիայի դեպքում: Բացի այդ` սա կապված է ԵՄ-ի տնտեսական ճգնաժամի հետ: Թուրքական կառավարությունը կարող է իրեն թույլ տալ նման հայտարարություններով առաջ շարժվել` «Կորցնելու ոչինչ  չունենք» սկզբունքով»:

Պիսկորսկու կարծիքով այսօրվա դրությամբ ոչ միայն բացառվում է Թուրքիայի անդամակցությունը ԵՄ-ին, այլ նաեւ չի սպասվում վիզային ռեժիմի պարզեցում: «Հաշվի առնելով եվրոպացի ընտրազանգվածի  վերաբերմունքը ԵՄ ներգաղթյալների վերաբերյալ` Եվրոպան հազիվ թե գնա այդ քայլին: Այդ զրույցները քաղաքավարի բանակցություններ են, որոնք շարունակվում են արդեն բազմաթիվ տարիներ եւ ոչնչով չեն ավարտվի, որից միայն  Եվրոպան կշահի»,- ընդգծել է փորձագետը եւ ավելացրել, որ ԵՄ-ն ավելի շուտ չեղյալ կհայտարարի  Ռուսաստանի հետ վիզային ռեժիմը, քան` Թուրքիայի:

Ինչպես նախկինում հայտնել է NEWS.am-ը, Թուրքիան դեռեւս հունիսի սկզբներից դադարեցրել է Եվրոմիության հետ պայմանագիրը այնքան ժամանակ, քանի դեռ ԵՄ-ի նախագահությունը կգլխավորի  Կիպրոսի Հանրապետությունը: Թուրքիայի արտգործնախարար Ահմեդ Դավութօղլուն ԵՄ-ի արտաքին քաղաքկանության եւ անվտանգության հարցերով զբաղվող ներկայացուցիչ Քեթրին էշթոնի եւ Եվրոպական հարեւանության քաղաքականության հանձնակատար   Շտեֆան Ֆյուլեի հետ համատեղ ասուլիսի ժամանակ հայտարարել է, որ թուրքական ոչ մի ներկայացուցչություն կիպրոսյան նախագահության ընթացքում չի համագործակցի ԵՄ-ի հետ: «Բայց շփումները (Էշթոնի եւ Ֆյուլեի հետ) կշարունակվեն»,- ավելացրել է նա:

news.am