«Այս տարվա նոյեմբերի 4-ին Դիարբեքիրի Սուրբ Կիրակոս եկեղեցում նախատեսվող երկրորդ պատարագը կմատուցվի լիովին վերականգնված վանական համալիրում». Արամ Աթեշյան

Սփյուռքի նախարարության հրավերով «Իմ Հայաստան» մշակութային փառատոնի շրջանակներում Հայաստանում գտնվող պոլսահայ «Սուրբ Վարդանանց դպրաց դաս» երգչախմբի անդրանիկ համերգին մասնակցելու նպատակով Վանաձոր այցելած Պոլսո հայոց պատրիարքության պատրիարքական ընդհանուր փոխանորդ, արքեպիսկոպոս Արամ Աթեշյանը բացառիկ հարցազրույց է տվել «Ակունքի» թղթակից Մելինե Անումյանին, որը ներկայացնում ենք ստորև:

Մելինե Անումյան-Սրբազա’ն, թուրքական մամուլում տեղ գտած հրապարակումներից հայտնի է դարձել, որ Վանա լճի Աղթամար կղզում գտնվող Սուրբ Խաչ եկեղեցում վերականգնումից հետո երրորդ պատարագը կմատուցվի այս տարվա սեպտեմբերի 9-ին: Մինչ այժմ ընդունված էր այստեղ ամենամյա պատարագ անել Հայ առաքելական եկեղեցու հինգ տաղավար տոներից Սուրբ Խաչի օրը: Ինչո՞ւ է այս անգամ այդ «ավանդույթը» խախտվել:

Արամ Աթեշյան-Այս տարի Սուրբ Խաչի տոնը նշվելու է սեպտեմբերի երրորդ շաբաթվա մեջ` ամսի 16-ին: Սակայն մենք ավանդույթ ենք դարձրել, որ պատարագը Սուրբ Խաչում մատուցենք ամեն տարվա սեպտեմբերի երկրորդ կիրակի օրը: Այդ պատճառով այս տարվա պատարագը պիտի անենք սեպտեմբերի 9-ին: Աղթամար կղզու Սուրբ Խաչ եկեղեցում պատարագի այս տարվա պատարագիչը կլինի Հայ առաքելական եկեղեցու ԱՄՆ-ի արևելյան թեմի առաջնորդ Խաժակ արքեպիսկոպոս Պարսամյանը, ով իր հետ կբերի 60-70 հոգանոց ուխտավորներից բաղկացած ամերիկահայերի մի խումբ: Այս խումբը, պատարագին մասնակցելուց առաջ կշրջի այստեղի (Արևմտյան Հայաստանի-Ակունքի խմբ.) գավառներում, իսկ պատարագից հետո կուղևորվի Դիարբեքիր, ապա` կգա Պոլիս: Մենք ևս` մեր հոգևորականների հետ մեկտեղ, ներկա կգտնվենք Աղթամարի Սուրբ Խաչ եկեղեցու պատարագին:

Մելինե Անումյան-Սուրբ Խաչ եկեղեցու` այս տարվա պատարագին ներկա կլինե՞ն նաև Թուրքիայի պետական բարձրաստիճան պաշտոնյաներ:

Արամ Աթեշյան-Ո’չ, միայն եկեղեցու վերաբացման և առաջին պատարագի առթիվ էինք մենք պաշտոնատար անձանց հրավիրել: Դրանից հետո պաշտոնատար այրերի այլևս չենք հրավիրում:

Մելինե Անումյան-Իսկ ե՞րբ է նախատեսվում Մերձավոր Արևելքի երկրորդ ամենամեծ եկեղեցու` Դիարբեքիրի Սուրբ Կիրակոս հայկական եկեղեցու` այս տարվա պատարագը:

Արամ Աթեշյան-Սուրբ Կիրակոս եկեղեցու պաշտոնական բացումն արել ենք անցյալ տարի, երբ մայր եկեղեցին լիովին վերականգնված էր: Սակայն Սուրբ Կիրակոսի վանական համալիրը մեծ է և բաղկացած է մատուռից, քահանայատնից, թաղային խորհրդի սենյակներից, փոքր դպրոցից, զագակատնից: Վանական համալիրի շինարարությունը ներկայում շարունակվում է: Այս տարվա նոյեմբերի 4-ին կկատարվի Սուրբ Կիրակոսի երկրորդ պաշտոնական բացում, քանի որ ամբողջապես կվերաբացվի վանական համալիրը: Մինչ այդ կվերակառուցվի համալիրի պատմական զանգակատունը, որի զանգը պատրաստել եմ տվել Մոսկվայում: Այն արդեն ստացել ենք: Հիմա վերականգնվում են քահանայատունը և թաղային խորհրդի սենյակները, իսկ մատուռը վերակառուցվում է, քանի որ այն այրված է եղել: Նախատեսում ենք շուտով ավարտին հասցնել վանական համալիրի ամբողջական վերականգնումը: Այս առումով մեր միակ հոգսը նյութականն է: Դեռևս պակասում է մեկ միլիոն դոլարի չափով գումար: Այդ պատճառով ես պետք է այցելեմ տարբեր վայրեր` դիմելով մեր հարգելի բարերարներին, որպեսզի կարողանանք այդ պակասը լրացնել և վերջնական ավարտին հասցնել վանական համալիրի վերականգնումը:

Akunq.net