Թուրք վերականգնողները փչացրել են ճարտարապետ Սինանի կառուցած մզկիթի ակուստիկան

Թուրք վերականգնողները փչացրել են միջնադարի հայ ճարտարապետ, Օսմանյան կայսրության գլխավոր ճարտարապետ Սինանի կողմից Պոլսում կառուցված Սուլեյմանիե մզկիթի հրաշալի ակուստիկան:
Ինչպես հաղորդում է «Արմենպրես»-ը` վկայակոչելով թուրքական Haber 3 լրատվական կայքը, մզկիթի ակուստիկան փչացել է սխալ վերանորոգման աշխատանքների պատճառով: Այժմ Սուլեյմանիե մզկիթում իմամի ձայնը տարածվում է տասնյակ բարձրախոսների միջոցով` այն դեպքում, երբ մինչ վերանորոգումը դրա կարիքը բոլորովին չի եղել եւ մզկիթը հռչակավոր է համարվել նաեւ իր այդ առանձնահատկության շնորհիվ: Կայքը մզկիթի ակուստիկայի վերանալու փաստը թուրքական ճարտարապետության համար մեծ ամոթ է որակել:
Սուլեյմանիե մզկիթը ճարտարապետ Սինանը կառուցել է 1557 թ.-ին` օսմանյան կայսր Սուլեյմանի օրոք: Մզկիթում հիասքանչ ակուստիկա ապահովելու համար ճարտարապետ Սինանը նրա գմբեթներին 15 սմ բերանի բացվածքով եւ 45 սմ երկարությամբ 256 անոթներ է տեղադրել: Ակուստիկան ապահովում էր այդ անոթների դատարկությունը, որը ակուստիկայի գրականության մեջ նշվում է որպես «դատարկ ռեզոնատորների տեխնիկա»:
Ենթադրվում է, որ մզկիթի ակուստիկան փչացել է 2007-2010 թթ.-ին վերանորոգման աշխատանքներ կատարելու ժամանակ սխալ եւ սինթետիկ նյութեր օգտագործելու պատճառով: Վերականգնողական աշխատանքներին մասնակցել են 200 մասնագետներ: Կատարվել են ամրապնդման աշխատանքներ: Մաքրվել են տարբեր ժամանակներում կատարված վերանորոգումների ժամանակ թույլ տրված թերությունների հետքերը:

http://armenpress.am/arm/news/689330/turq-verakangnoxnery-pchacrel-en-tchartarapet-sinani-karucats.html