Թուրքիան համաձայնվում է Սիրիայում քրդական ինքնավարության ստեղծմանը

Թուրքիայի արտաքին գործերի նախարար Ահմեդ Դավութօղլուի` օգոստոսի 1-ին իրաքյան Քրդստանի մայրաքաղաք կատարած այցից հետո հայտնի է դարձել, որ Քրդստանի առաջնորդ Մասուդ Բարզանիի հետ հանդիպման ժամանակ կողմերը համաձայնության են եկել «Բաշար Ասադի իշխանությունից հեռանալուց հետո» Սիրիայում քրդական ինքնավարություն ստեղծելու հարցում:
Ինչպես հաղորդում է «Արմենպրես»-ը` վկայակոչելով իրաքյան Քրդստանի AkNews լրատվական գործակալությունը, հանդիպման ժամանակ որոշվել է հավանություն տալ Սիրիայի ազգային խորհրդի եւ Սիրիայի քրդական ազգային խորհրդի միջեւ սիրիացի քրդերի պահանջների հետ կապված համաձայնագրի ստորագրմանը, որին պետք է մասնակցեն նաեւ Դավութօղլուն եւ Բարզանին:
Անունը հրապարակել չցանկացած քուրդ առաջնորդներից մեկը գործակալությանը հայտնել է, որ «Դավութօղլուի մասնակցությունն այդ համաձայնագրի ստորագրությանը կնշանակի, որ թուրքական կառավարությունը համաձայն է Ասադից հետո Սիրիայի դաշնային պետություն դառնալուն եւ քրդերին դաշնային իրավունքների վերապահմանը»: Ըստ քրդական կայքի` ենթադրվում է, որ եւ’ Թուրքիան, եւ’ Սիրիայի ազգային խորհուրդն աջակցում են «Ասադից հետո Սիրիայի քրդական վեճին»:
Սիրիայի քրդական «Դեմոկրատական միասնություն կուսակցության» (PYD) առաջնորդներից Մահմուդ Մուհամեդը գործակալությանը տված հարցազրույցում հայտարարել է, որ հուսադրված է հիշյալ համաձայնագրի հաջողությամբ, ինչը, նրա խոսքով, կհստակեցնի Սիրիայում քրդերի ապագան: «Սիրիայի ազգային խորհուրդը ճանաչում է քրդերի իրավունքները եւ պատրաստ է այդ հարցում համաձայնագիր պատրաստել: Դա սիրիացի քրդերի ապագան հստակեցնելուն ուղղված քայլ է», -ասել է նա:

http://armenpress.am/arm/news/689349/turqian-hamadzaynvum-e-siriayum-qrdakan-inqnavarutyan.html