Թուրքիայի փոխվարչապետը բոլորին խորհուրդ է տվել այցելել պատմական Անի

Կարսի նահանգում այցով գտնվող Թուրքիայի փոխվարչապետ Բեքիր Բոզդաղն այցելել է Հայաստանի պատմական մայրաքաղաքաներից Անին։
Թուրքական Haberfx-ի փոխանցմամբ՝ Անին շրջելուց հետո Թուրքիայի փոխվարչապետը հայտարարել է, թե բոլորը պետք է այցելեն Անի։
«Մեծ պատմության, մշակույթի եւ քաղաքակրթության գանձարան, մեծ քաղաքակրթության պատմական արժեքների հետքերն այստեղ տեսանք։ Բոլորին կոչ եմ անում այցելել եւ տեսնել այս մշակույթն ու պատմությունը։ Այս պահին մեր մշակույթի եւ տուրիզմի նախարարության կողմից այստեղ վերանորոգման աշխատանքներ են ընթանում»,-ասել է Թուրքիայի փոխվարչապետ Բեքիր Բոզդաղը։
Անին շրջելու ընթացքում փոխվարչապետին ուղեկցել են Կարսի քաղաքապետը, Կարսի նահանգապետը, կարսից ընտրված պատգամավորներ եւ այլք։
Նշենք, որ Թուրքիայի փոխվարչապետը ոչ մի բառ չի ասել Անիի հայկական լինելու մասին։ Ավելին, Անիում ոչ մի ցուցանակի վրա չկա «հայ» կամ «Հայաստան» գրությունը։

http://news.am/arm/news/115721.html