Մնձուրի բնության և մշակույթի այ տարվա` 12-րդ փառատոնը ավարտվել է Դերսիմ քաղաքի մարզադաշտում կազմակերպված միջոցառմամբ: Այս տարի «Թո’ղ ճանաչվի Դերսիմի ցեղասպանությունը: Ջրամբարները երկրորդ 1938 թ. են» կարգախոսով կազմակերպված փառատոնի շրջանակներում 4 օր շարունակ իրականացվել են քննարկումներ, ցուցահանդեսներ, փաստագրական ֆիլմերի ցուցադրություններ և համերգներ, որոնց մասնակցել են հազարավոր մարդիկ:
«Էվրենսել» օրաթերթի հաղորդմամբ` փառատոնի ողջ ընթացքում շեշտվել է բնության կոտորածի դեմ ավելի ուժգին պայքար մղելու անհրաժեշտության մասին, և Արդարություն ու զարգացում կուսակցության ներկայացուցիչ իշխանավորներին կոչ է արվել` հաշվի առնել ժողովրդի կամքը: Փառատոնի շրջանակներում ընդգծվել է, որ մշակութային ուծացումը շարունակվում է, և ուշադրություն հրավիրվել բոլորի` սեփական մայրենի լեզվով հաղորդակցվելու իրավունքի վրա: Փառատոնի վերջին օրը ելույթ ունեցած Խաղաղություն և ժողովրդավարություն կուսակցության պատգամավոր Սեբահաթ Թունջելը օրերս Մալաթիայում արձանագրված ալևիների վրա հարձակվելու դեպքի համար պատասխանատու է համարել վարչապետ Էրդողանին:
Փառատոնի վերջին օրը քաղաքի գրադարանի այգում բանավեճ է կազմակերպվել` «Դերսիմի 1938 թ. ցեղասպանությունը. պահանջներ, փոխհատուցում և շահարկում» թեմայով, որի շրջանակներում մասնակիցները մեկ րոպե լռությամբ հարգանքի տուրք են մատուցել Դերսիմի կոտորածի զոհերի հիշատակին: Բանավեճի ընթացքում մասնակիցներն ընդգծել են պետական արխիվները բացելու և կոտորածների հետ հաշվի նստելու անհրաժեշտությունը:
Մնձուրի փառատոնի վերջին օրը աղոթքներ են հնչեցվել Հալվորի գյուղում` հենց այն վայրում, որտեղ դերսիմցիների 400 հոգանոց մի խումբ էր կոտորվել 1938 թ.: Այստեղ ելույթ ունեցած Դերսիմի քաղաքապետ Էդիբե Շահինը նշել է, թե Թուրքիայում կոտորելու մտայնությունը մինչ օրս ոչ մի փոփոխության չի ենթարկվել, իսկ պատգամավոր Սեբահաթ Թունջելը պահանջել է հրապարակել 1938 թ. կոտորածին վերաբերող բոլոր փաստաթղթերը:
Akunq.net
Leave a Reply