Գյուլին տխրեցրել է Հայաստանի հետ հարաբերությունները կարգավորելու նախաձեռնության ձախողումը

Թուրքիայի նախագահի մամուլի հարցերով գլխավոր խորհրդական Ահմեդ Սեւերը հայտարարել է, որ նախագահ Աբդուլլա Գյուլին խիստ տխրեցրել է Հայաստանի հետ հարաբերությունները կարգավորելուն ուղղված նախաձեռնության ձախողումը: «Արմենպրես»-ի հաղորդմամբ` Սեւերն այս մասին հայտարարել է թուրքական «Վաթան» թերթին տված հարցազրույցում:
Անդրադառնալով այն հարցին, թե նախագահության հինգ տարիների ընթացքում Թուրքիայի նախագահը որ հարցերի շուրջ է հուսալքություն արտահայտել` Սեւերն ասել է. «Թուրքիայում որոշ առանցքային խնդիրներ կան, որոնցից գլխավորը քրդական եւ հայկական հարցերն են: Այդ երկու հարցերում էլ նախագահը լուրջ քայլեր է կատարել: Հայկական հարցում նրա քայլերից մեկն էլ Երեւան` «մեկ կիլոմետր քար» բնութագրվող այցն էր: Դրանից հետո դիվանագիտական բազմաթիվ քայլեր ձեռնարկվեցին: Գյուլը հանդես եկավ եւ քրդական, եւ հայկական հարցի լուծման հարցում լավատեսությամբ, սակայն, այդ երկու նախաձեռնությունների փակուղի մտնելու իրողությունը, իրականում, խիստ տխրեցրեց նրան»: Չցանկանալով մեկնաբանել Թուրքիայի համար խիստ կարեւոր այդ երկու հարցերը փակուղի մտնելու իրական պատճառները` նա միայն ասել է, որ Թուրքիայի նախագահը մեծ անհաջողություն է համարում այդ երկու գործընթացների «ձախողումը»:
Նախագահի մամուլի հարցերով գլխավոր խորհրդականը միանգամայն հնարավոր է համարել նաեւ այն, որ Գյուլը կարող է երկրորդ անգամ առաջադրվել նախագահության թեկնածու: «Նախագահ Գյուլը հնարավոր է երկրորդ անգամ դնի իր թեկնածությունը 2014 թ. կայանալիք նախագահական ընտրություններում», -ասել է Սեւերը: Նա ավելացրել է, որ դրան խոչընդոտող իրավական արգելքները, որոնք ներկայում հնչեցվում են տարբեր շրջանակների կողմից, միանգամայն լուծելի են:

http://armenpress.am/arm/news/689018/gyulin-tkhrecrel-e-hayastani-het-haraberutyunnery-kargavorelu.html