ԱՄՆ-ն Թուրքիայում կրոնական սահմանափակումները դատապարտող զեկույց է հրապարակել

ԱՄՆ պետքարտուղարությունը հրապարակել է 2011 թ. հետազոտությունների արդյունքների հիման վրա կրոնական թեմայով պատրաստած ամենամյա զեկույցը: Ինչպես հաղորդում է «Արմենպրես»-ը` վկայակոչելով թուրքական «Հուրիեթ» պարբերականը, զեկույցի` Թուրքիային վերաբերող 13 էջանոց բաժնում խստորեն քննադատվել է այդ երկրում կրոնական ազատությունների ոտնահարումները:
Զեկույցում թուրքական իշխանություններին դատապարտում են այն բանի համար, որ «աշխարհիկ պետություն» սկզբունքի պահպանման հիմնավորմամբ, երկրում մշտապես սահմանափակումներ են մտցվում մահմեդականների, ինչպես նաև այլ կրոնական խմբերի ներկայացուցիչների նկատմամբ: Քննադատվել է պետության կողմից Հեյբելիադա կղզում հոգևոր դպրոցի բացման համար անհրաժեշտ միջոցառումներ չիրականացնելը: Զեկույցում ներկայացված է, թե ինչպես ալևիական, եզդիական կրոնական խմբերը շարունակ դժվարությունների են հանդիպում պաշտամունքի իրականացման ազատության գործում:
ԱՄՆ պետքարտուղարությունը նշել է նաև, որ Թուրքիայի շատ մուսուլմաններ կրոնափոխ լինելու դեպքում իրենց բարեկամների և ծանոթների կողմից բռնությունների են ենթարկվում:
http://armenpress.am/arm/news/689070/amn-n-turqiayum-kronakan-sahmanapakumnery-datapartox.html