Մալաթիայում ալևի ընտանիքին փորձել են լինչի դատաստանի ենթարկել

Թուրքիայում մուսուլմանների սուրբ ամսվա` Ռամադանի ընթացքում պաս պահելուց հրաժարված ալևի ընտանիքին փորձել են ենթարկել լինչի դատաստանի. տեղեկացնում է «Ակօս»-ը:
Միջադեպը տեղի է ունեցել Մալաթիա նահանգում: Մոտ 50-60 մարդուց բաղկացած խումբը, Թուրքիայի հիմնը երգելով, հասել է ալևիների տան մոտ, հայտարարել, որ այդ ընտանիքն այսօր պետք է լքի տունը, ապա կոտրել տան բոլոր պատուհաններն ու այրել գոմը:
Պարզվել է, որ քուրդ-ալևի Էվլիների ընտանիքին պատկանող միահարկ առանձնատան մոտ, Ռամադանի կապակցությամբ, դհոլ են նվագել: Ընտանիքի անդամներն էլ ասել են, որ պաս չեն պահում և առավոտյան աշխատանքի են գնալու, ուստի խնդրել են չխանգարել իրենց: Դհոլահարների ու տանտերերի մեջ վիճաբանություն է սկսվել:
Ավելի ուշ 50-60 հոգանոց խումբը հավաքվել է տան մոտ ու հայտարարել, որ ընտանիքը պետք է լքի գյուղը:
Լեյլա Էվլին նկարահանել է իրենց` լինչի դատաստանի ենթարկելու եկած թուրքերին և ցույց տվել լրագրողներին:
«Նրանց նպատակը հայտնի էր` մեզ սպանելու էին եկել: Նրանք բղավում էին` «մահ քրդերին», «մահ ալևիներին», «դուք պետք է հեռանաք այստեղից»,-պատմել է նա:
Մալաթիայի շրջանից ընտրված պատգամավոր Վելի Աղբաբան Twitter-ում կողմերին հանդարտության կոչ է արել:

http://tert.am/am/news/2012/07/30/malatya-linch/