Մագլցում` Սասնա Մարութա լեռը

Հայ քաղաքացիներից բաղկացած մի խումբ երեկ մագլցել է Բաթմանի Սասուն գավառում գտնվող և 2.983 մ բարձրություն ունեցող Մարութա /Մարաթուկ/ լեռը: Ուխտավորների մեջ են եղել նաև Սասնա լեգենդար լեռան անունը կրող «Մարաթուկ» երգի-պարի ազգագրական համույթի անդամները:
Այդ մասին հաղորդում է Անադոլու լրատվական գործակալությունը: Աղբյուրի փոխանցմամբ` դեպի Մարութա սար ավանդաբար ամեն տարի կազմակերպվող ուխտագնացության շրջանակներում Հայաստանից, Ստամբուլից և այլ քաղաքներից ժամանած 150 հոգանոց խումբն արևածագը դիմավորել է Մարաթուկի` 2983 մ բարձրություն ունեցող գագաթից և մոմ վառել ու աղոթք է արել լեռան բարձրունքին գտնվող եկեղեցում:
Ուխտավորները Փուրշենգ յայլայում մատաղ անելուց հետո դիտել են Հայաստանից ժամանած «Մարաթուկ» երգի-պարի հայտնի ազգագրական համույթի կատարումները:
Համույթի տնօրեն Հասմիկ Բաղդասարյանը Անադոլու գործակալությանը հայտնել է, որ «Մարաթուկ»-ն առաջին անգամ է համերգով հանդես գալիս Մարութա լեռան վրա:
«Ակօս» շաբաթաթերթի թղթակիցներից Նիշան Գիրեքը նշել է, թե հաճախ է հրապարակումներ պատրաստել Սասնա մշակութային միջոցառումների մասին, և թեև բազմիցս է լսել Մարութա լեռան անունը, սակայն միայն այսօր է իրեն վիճակվել այս սարը տեսնելու հնարավորություն:
Լեռը մագլցողների մեջ է եղել նաև Բաթմանի զբոսաշրջության միության նախագահ Էմին Բուլութը, ով լրատվական գործակալությանը հաղորդել է, թե իրենք աշխատանքներ են տանում` Սասունը տարվա բոլոր եղանակներին զբոսաշրջիկների առջև բացելու ուղղությամբ, և որ 10 վավերագրական ֆիլմ են նկարահանելու` գավառի բնական և պատմական տեսարժան վայրերը ներկայացնելու նպատակով:
Հիշեցնենք, որ «Մարաթուկ» երգի-պարի ազգագրական համույթն անցյալ տարի Արևմտահայոց հարցերի ուսումնասիրության կենտրոնի նախաձեռնությամբ մասնակցել էր Դերսիմում ավանդաբար ամեն տարի կազմակերպվող Մնձուրի բնության և մշակույթի փառատոնին: «Ակունք»-ի տեղեկությունների համաձայն` այս տարի «Մարաթուկ»-ը նախքան Սասնա Մարութա լեռ ուխտագնացություն կատարելը համերգ է տվել նաև Ստամբուլում:
Akunq.net