Թուրք գավառապետն ու քաղաքապետն արգելել են հայերին ուխտագնացություն կատարել Մարութա սար

Արեւմտյան Հայաստան համերգային ծրագրով մեկնող “Մարաթուկ” ազգագրական երգի եւ պարի համույթը, հնարավոր է, որ չմասնակցի այս օրերին աշխարհի տարբեր անկյուններում ապրող շատ հայերի համախմբող Մարութա սարի ուխտագնացությանը: Սասունի գավառապետ Բահադըր Յորյուքը եւ քաղաքապետ Մուսաֆեր Արսլանն արգելել են հայերին` ուխտագնացություն կատարել դեպի 2973 մետր բարձրություն ունեցող Մարութա սարի վրա գտնվող հայկական եկեղեցի:
Ուխտագնացությունը նախատեսված էր հուլիսի 28-ին, որին մասնակցելու էր շուրջ 15 հազար հայ` Հայաստանից, Միացյալ Նահանգներից, Լիբանանից, Իտալիայից, Ֆրանսիայից, Սիրիայից եւ հայկական սփյուռքի այլ շրջաններից: Թուրք պաշտոնյաներն իրենց որոշումը հիմնավորել են նրանով, որ ուխտագնացության ժամկետը համընկնում է մուսուլմանների համար սուրբ համարվող Ռամադանի հետ: Նրանք առաջարկել են ուխտագնացությունն իրականացնել սեպտեմբեր ամսին:
Հիշեցնենք` անցյալ տարի “Մարաթուկը” (Արևմտահայոց հարցերի ուսումնասիրությունների կենտրոնի նախաձեռնությամբ-Ակունքի խմբ.) մասնակցել էր ավանդական դարձած դերսիմյան Մնձուրի փառատոնին, որից հետո ուխտել էին կրկին լինել պատմական հայրենիքում եւ մասնակցել Մարութա սարի ուխտին: Այնուհանդերձ, անկախ ամեն ինչից, մարաթուկցիները պատրաստվում են այսօր Արգավանդի Սուրբ Սարգիս եկեղեցում օրհնություն ստանալուց հետո, ճամփա ընկնել Էրգիր:
Ի դեպ, ուխտին մասնակցող խմբերից մեկի ներկայացուցիչները, ովքեր արդեն Արեւմտյան Հայաստանում են, տեղեկացրեցին, որ անկախ ամեն ինչից` մասնակցելու են ուխտին եւ հաղթահարելու են 2973 մետր բարձրություն ունեցող Մարութա սարի բարձունքը:

http://www.yerkirmedia.am/?act=news&lan=hy&id=8682