Թուրքիայի քաղաքացիությունը չի ենթադրի պարտադիր թրքություն

Թուրքիայում շարունակվում են սահմանադրության մեջ թուրք ինքնության բացառման մասին բանավեճերը:
Թուրքիայի իշխող Արդարություն և զարգացում կուսակցության կողմից Թուրքիայի Ազգային մեծ ժողովի Սահմանադրական փոփոխությունների համաձայնեցման հանձնաժողովին է ներկայացվել առաջարկությունների փաթեթ, որի հիմնական առանցքը նոր սահմանադրության մեջ թուրք ինքնության փոխատեղումն է քաղաքացիության հետ առնչվող հասկացություններով: Այդ մասին տեղեկացնում է Թարաֆ օրաթերթը:
1982 թ. ընդունված և այժմ գործող Սահմանադրության 66-րդ հոդվածում նշված է , որ Թուրքիայի հանրապետության հետ քաղաքացիության կապ ունեցող յուրաքանչյուր ոք թուրք է: Այս հոդվածը խախտում է Թուրքիայում ապրող ազգային փոքրամասնությունների իրավունքները և կարող է պատճառ դառնալ երկրի մասնատման, քանի որ առնվազն 20 մլն քուրդ քաղաքացիներ չեն պատրաստվում իրենց թուրք համարել:
Իշխող կուսակցությունն առաջարկում է հանել սահմանադրությունից «թուրք» հասկացությունը` փոխարենը առաջարկելով այլընտրանքներ.
1. Թուրք քաղաքացիություն
2. Թուրքիայի Հանրապետության քաղաքացիություն
3. Սահմանադրության մեջ քաղաքացիության մասին ոչ մի հիշատակում, այլ` օրենսդրական կարգավորում
4. Ազգային և էթնիկ հասկացությունների բացառում և միայն քաղաքացիության հիշատակում:
Վերոհիշյալը վկայում է, որ քաղաքակիրթ երկրներին բնորոշ ազգային պատկանելիության փոխարեն քաղաքացիության հիշատակումը Սահմանադրության և անձնագրերի մեջ դժվարությամբ է ճանապարհ հարթելու Թուրքիայում:

http://www.armweeklynews.am/awn/mj12/mj_1129.htm