Թուրքիան «զրո խնդրի» փոխարեն կանգնել է «հարյուր հարցի» առաջ. թուրք վերլուծաբան

Հարեւանների հետ «զրո խնդիր» արտաքին քաղաքականություն հայտարարած Թուրքիան այժմ կանգնել է «հարյուր հարցերի» առաջ: Այս մասին, ինչպես հաղորդում է «Արմենպրես»–ը, թուրքական «Միլիեթ» թերթում գրում է թուրք հայտնի քաղաքական վերլուծաբան Մեհմեդ Ալի Բիրանդը` քննադատելով տարածաշրջանի երկրների նկատմամբ Թուրքիայի որդեգրած արտաքին քաղաքականությունը:

Բիրանդի կարծիքով` Թուրքիան «զրո խնդիր» քաղաքականությունը մտադրել է հարեւանների հետ հարաբերություններում թույլ տված սխալները լուծելու ճանապարհներ որոնելու նպատակով, սակայն, կարճ ժամանակ չանցած` կրկին շատ սխալներ է թույլ տվել եւ կանգնել «հարյուր հարցի» առաջ:  Բիրանդը գտնում է, որ «Անկարայի գլխին ամենասեւ ամպը Դամասկոսն է»:

«Արտաքինից այնպես է երեւում, որ Սիրիայի ընդդիմությանը Թուրքիան է ուղղորդում: Այստեղ ամենավտանգավորն այն է, որ բոլորովին պարզ չէ, թե Սիրիայում ստեղծվելիք հնարավոր նոր իշխանությունը ինչպիսի տրամադրվածություն կունենա Անկարայի նկատմամբ: Ասադի վարչակազմի տապալվելու կամ էլ իրադարձություններն արյունալի ներքին պատերազմի շրջվելու դեպքում իրավիճակը կընդլայնի քրդական խնդրի չափերը, կազդի Իրաքում Մալիքիի վարչակարգի, Լիբանանում «Հըզբոլլահ»-ի գործունեության ու Պաղեստինի խնդրի վրա, տարածաշրջանում Իրանի դիրքը կփոխվի: Ներկա պահին ոչ ոք չի կարող հստակորեն պատկերացնել Սիրիայի ապագան, եւ հնարավոր է` այնտեղ ձեւավորվելիք նոր իշխանությունը թշնաբար տրամադրվի Թուրքիայի նկատմամբ: Թուրքիայի մյուս մտահոգությունը Իրաքի եւ Սիրիայի սունի-շիա-քրդական մասերի բաժանում է», – գրում է Բիրանդը: Նա նշել է, որ այդ խառնաշփոթության վարագույրի հետեւում սունի-շիա հնարավոր բախումն է, Անկարային խիստ մտահոգող Սիրիայում քրդական ինքնավարություն ստեղծվելու մեծ հավանականությունը եւ Թուրքիա թափանցելու հնավորությունը:

http://armenpress.am/arm/news/688750/turqian-zro-khndri-pokharen-kangnel-e-haryur-harci.html