Փակուղում հայտնված Թուրքիան փակել է Սիրիայի հետ սահմանը

Թուրքիան, այսօր` հուլիսի 25-ին, փակում է Սիրիայի հետ իր սահմանային անցակետերը: Այս մասին հայտնել է Թուրքիայի մաքսային գործերի նախարար Հայաթի Յազըջին:

Բոլոր 13 անցակետերի փակումը, որոնց Սիրիայի հետ սահմանային երկարությունը կազմում է շուրջ 900 կմ, նախատեսված է Դամասկոսի նկատմամբ ԱՆկարայի նոր պատժամիջոցների փաթեթով, հաղորդում է «ՌԻԱ նովոստին»` վկայակոչելով NTV հեռուստաալիքը: Ընդունված որոշման համաձայն, հուլիսի 25-ին թուրք-սիրիական սահմանով կդադարեցվեն բոլոր տեսակի բեռնափոխադրումները:

Ինչպես հաղորդում է Reuters-ը, թուրքական իշխանությունների գործողությունները կապված են այն բանի հետ, որ ավելի վաղ «Սիրիայի ազատ բանակի» անդամները բազմիցս հարձակվել են Թուրքիայի հետ սահմանային անցակետերի վրա:

Նշվում է, որ թուրքական իշխանությունների կողմից ձեռնարկվող քայլերը չեն անդրադառնա փախստականների անցուդարձի վրա, ովքեր ամեն օր ժամանում են Սիրիայից: Թուրքիայի իշխանությունները, տեղի լրատվամիջոցների փոխանցմամբ, մտադիր են իրենց տարածքում սիրիացի փախստականների համար եւս 3 ճամբար ստեղծել: Ներկայում Թուրքիայի տարածքում են գտնվում շուրջ 45 հազար սիրիացիներ:

Միաժամանակ, այդ ճամբարներում իրավիճակը ծայրահեղ լարված է: Նախօրեին բախում է տեղի ունեցել փախստականների ու թուրք ժանդարմների միջեւ: Անկարան, ըստ էության, սեփական քաղաքականության պատանդն է դարձել: Էրդողանի կառավարությունն ակտիվորեն նպաստել է Սիրիայի տարածք գրոհայինների մուտքին, PR ակցիա է արել փախստականների ճամբարներ բացելով ու հիմա երկու «ճակատներում» էլ կորցնում է իրավիճակի վերահսկողությունը:

http://hayeli.am