Թուրքիան թույլ չի տա Սիրիայի հյուսիսում քրդական պետություն ձևավորել. Էրդողան

«Քրդական պետության ստեղծումը Սիրիայի հյուսիսում վտանգ է ներկայացնում Թուրքիայի համար, ինչի պատճառով էլ Անկարան դա թույլ չի տա»,-hայտարարել է Թուրքիայի վարչապետ Ռեջեփ Թայիփ Էրդողանը` թուրքական 24 TV հեռուստաընկերությանը տված հարցազրույցի ընթացքում:

Նա նշել է, որ Անկարան Սիրիայի հյուսիսում տեղի ունեցող իրադարձություններին «ձեռքերը ծալած չի հետևելու» և անհրաժեշտ քայլեր է ձեռնարկելու:
Թուրքիայի վարչապետը տեղեկացրել է նաև, որ հաջորդ շաբաթ Թուրքիայի արտգործնախարար Ահմեթ Դավութօղլուն կմեկնի Հյուսիսային Իրաքի քրդական ինքնավարություն` քննարկելու համար իրավիճակը:

Երեկ տեղեկություններ էին տարածվել այն մասին, որ Թուրքիայի սահմանի մոտ ընկած մի շարք բնակավայրեր հայտնվել են քրդական խմբերի ձեռքում: Վերջիններս այդ վայրերում իջեցրել են Սիրիայի դրոշը և փոխարենը տեղակայել Հյուսիսային Իրաքի քրդական ինքնավարության դրոշը:

Երեկ Ահմեթ Դավութօղլուն իր ելույթում դարձյալ անդրադարձել է Սիրիայի իրավիճակին ու մեղադրանքներ հնչեցրել նախագահ Բաշար ալ Ասադի հասցեին.
«Սիրիայում մեզ համար միայն մի ճանապարհ կա` մեր սիրիացի եղբայրներին աջակցելը: Եթե մենք մեր տարածաշրջանին տեր չենք կանգնելու, ապա քաղաքականությամբ զբաղվելը որևէ արժեք չունի»:

http://tert.am/am/news/2012/07/26/erdoghan-davutoghlu-syria/