Տրապիզոնի նավահանգիստն արդեն օգտագործվում է հայկական բեռների փոխադրման համար

Տրապիզոնի նավահանգիստը փաստացի օգտագործվում է դեպի Հայաստան եւ Հայաստանից բեռնափոխադրումների իրականացման համար:  Այդ մասին NEWS.am-ի թղթակցին ասաց Հայաստանի արդյունաբերողների եւ գործարարների միության «Աջակցություն հայ-թուրքական հարաբերությունների բարելավմանը» ծրագրի տնօրեն Արթուր Ղազարյանը` ընդգծելով, որ այդ նավահանգստի օգտագործումն իրատեսական է նաեւ հետագայում: Նրա խոսքով` անցած տարվա ամռանը հայկական երկու բեռնատարներ տարանցիկ նպատակներով օգտվել են թուրքական տարածքից:

«Ներկայում Թուրքիան տարեկան 200 թույլտվություն է տրամադրում TIR-ի (Transport International Rout) բեռնատարներին` իր տարծքով տարանցիկ փոխադրումների համար: Բայց այստեղ խնդիր կա. համաձայն թուրքական օրենսդրության` տարանցիկ փոխադրում իրականացնող վարորդը պետք է աշխատանքային վիզա ունենա: Սակայն վիզա տրամադրվում է  դեսպանատը, որը մենք չունենք: Անցած տարվա երկու դեպքի համար ինչ-որ ձեւակերպումներ եղան ուկրաինական կողմի օգնությամբ»,-նշեց Ղազարյանը: Սակայն խնդիրն արդեն կարելի է լուծված համարել. թուրքական կողմի հետ պայմանավորվածություն է ձեռք բերվել այն մասին, որ  հայ վարորդներին վիզաներ կտրամադրվեն Վրաստանում Թուրքիայի դեսպանատան կողմից:

Միաժամանակ թուրքական կողմին տրվում է 200 թույլտվություն` Հայաստանի տարածքով տարանցիկ փոխադրումների համար: «Եթե նախկինում նրանք վճարում էին, հիմա արդեն երկու հարյուր բեռնատարի կթույլատրվի անվճար փոխադրում կատարել»:

Արթուր Ղազարյանը նկատեց, որ Տրապիզոնի նավահանգիստը իրական այլընտրանք է Փոթիի նավահանգստին:  Բացի այդ, Տրապիզոնի նավահանգստի օգտագործումը վրացական կողմին կստիպի վերանայել իր քաղաքականությունը մրցունակության առումով:

Ինչպես տեղեկացրել էր NEWS.am-ը, Թուրքիայի Տրապիզոնի նավահանգստի տնօրեն Մուզաֆեր Էրմիշը հայտարարել է, թե Տրապիզոնի նավահանգիստը պատրաստ է սպասարկել Հայաստանից ուղարկվող եւ Հայաստան առաքվող բեռնափոխադրումները:

«Հայաստանն այս պահին 7,5 մլրդ դոլարի արտահանում եւ ներմուծում է իրականացնում Վրաստանի Փոթիի նավահանգստի միջոցով: Դեպի Փոթի երկաթգիծ կա, սակայն այն մեծ ընդմիջումներով է գործում:  Երեւանից Տրապիզոն օրվա ցանկացած ժամի կարելի է հանգիստ հասնել:  Տրապիզոնից մինչեւ Ալիջանի սահման (Մարգարայի անցակետ-խմբ) 400 կմ է, իսկ այնտեղից Երեւան ընդամենը 30 կմ է: Մեր նավահանգիստը պատրաստ է նման ծավալի բեռնափոխադրումներ իրականացնել»,-նշել է Տրապիզոնի նավահանգստի տնօրենը՝ շեշտելով, որ ներկա պահին նավահանգիստն աշխատում է իր հնարավորությունների 25 տոկոսի չափով:

http://news.am/arm/news/114525.html