Մեծ եղեռնի մասին նոր ֆիլմում` հայերի պայքարը գերմանական բանկերի դեմ

Միացյալ Նահանգներում բնակվող հայերը պատրաստվում են Հայոց ցեղասպանության վերաբերյալ ֆիլմ նկարահանել, որը պատրաստ կլինի 2015 թ.` Մեծ եղեռնի 100-րդ տարելիցին:

Ֆիլմի անունը կլինի «The Genex»: Ֆիլմում կխոսվի ոչ միայն Օսմանյան կայսրությունում հայերի զանգվածային կոտորածների մասին, այլ նաև անդրադարձ կլինի գերմանական բանկերին, որոնց դեմ իրավական պայքար է ընթանում Ցեղասպանության զոհերի և վերապրածների ժառանգների կողմից: Գերմանական բանկերը միայն դատական որոշումներից հետո են պատրաստակամություն հայտնում վերադարձնել Ցեղասպանության զոհերի և վերապրածների ժառանգների ավանդները:

Ֆիլմի պատրաստման աշխատանքներով կզբաղվի Լոս Անջելեսում գործող հայկական “Edgeart Entertainment” պրոդյուսերական ընկերությունը: Ֆիլմի սցենարի հեղինակը կլինի ԱՄՆ-ում հայտնի սցենարիստ Ալան Կացը:

Ֆիլմում պատմվելու է, թե ինչպես է Կոմիտասը բանկային հաշիվ բացել Գերմանիայում, ինչպես և շատ հայեր: Այնուհետ ներկայացվելու է, թե ինչպես Ցեղասպանությունից հետո հայերի զգալի հատվածը կորցրել է իր գումարը ստանալու հնարավորությունը, որի դեմ պայքարն էլ էկրանավորվելու է նոր ֆիլմում:

http://haynews.am/hy/1343113887