Ստամբուլի հայկական Սուրբ Փրկիչ հիվանդանոցը շարունակում է մնալ լավագույններից մեկը Թուրքիայում

Շուրջ երկու դար առաջ կառուցված և այսօր Թուրքիայի տարածքում գտնվող հայկական Սուրբ Փրկիչ հիվանդանոցը մեր օրերում էլ հայկական համայնքի ջանքերով շաունակում է գործել: Ինչպես հաղորդում է «Արմենպրես»-ը` վկայակոչելով թուրքական Akşam պարբերականը, հայկական հիվանդանոցը ծառայում է ոչ միայն հայերին, այլև` Թուրքիայի չորս կողմից եկող տարբեր ազգերի ներկայացուցիչներին:

Հիվանդանոցի հիմնադրամի 180-րդ տարեդարձին նվիրված ցուցահանդեսի ժամանակ լրագրողի հետ զրուցել է հայկական հիմնադրամի ղեկավար խորհրդի անդամ Գրիգոր Դոշեմեչյանը: Վերջինս հիշեցնելով, որ հիվանդանոցը շարունակում է իր գործունեությունը միայն ու միայն հայական համայնքի շնորհիվ, նշել է, որ իրենք «ձգտում են պահպանել իրենց ազգային ինքնությունը և միաժամանակ հարմարվել արագ զարգացող տեխնոլոգիական նորարարություններին»:

Հիվանդանոցում ներկայում անվճար բուժում են ստանում 75 մտավոր հետամնաց, ինչպես նաև թմրանյութային կախվածություն ունեցող երեխաներ: Շուրջ 350 մարդ էլ ներկայում անվճար օթևանել է ծերանոցում: Հիվանդներին մաքուր օդով ապահովելու համար Սուրբ Փրկչի բակում հիմնվել է մեծ բանջարանոց:

Հայկական Սուրբ Փրկիչը մեծ դեր է ունեցել թուրքական բժշկության զարգացման գործում: Հենց այստեղ է հիմնվել առաջին վիրահատարաններից մեկը, այստեղ է բերվել Թուրքիայում առաջին ռենտգենի սարքավորումը, ինչպես նաև հայտնի է, որ հայկական հիվանդանոցի առաջատար բժիշկներից մեկը բուժել է Նապոլեոն 3-րդին:

http://armenpress.am/arm/news/687173/stambuli-haykakan-surb-prkich-hivandanocy-sharunakum.html