Հայոց ցեղասպանության թեմայով վեպի հեղինակ Էլիֆ Շաֆաքը Ֆրանսիայի կողմից արժանացել է «Արվեստի և գրականության ասպետ» մրցանակին

Արվեստի և գրականության ասպարեզում իրենց ստեղծագործություններով աչքի ընկած անձանց Ֆրանսիայի կողմից 1957 թ. սկսած ամեն տարի հանձնվող «Արվեստի և գրականության ասպետ» մրցանակը (Chevalier dans l’Ordre National des Arts et Lettres) այս տարի շնորհվել է Հայոց ցեղասպանության թեմայով վեպի հեղինակ Էլիֆ Շաֆաքին:

Թուրքական «Զաման» օրաթերթի փոխանցմամբ` Շաֆաքն իր մրցանակը հանդիսավոր կերպով ստացել է երեկ երեկոյան Ֆրանսիական պալատում կազմակերպված արարողության ժամանակ` Թուրքիայում Ֆրանսիայի արտակարգ և լիազոր դեսպան Լորեն Բիլիի կողմից:

Իր ելույթում Էլիֆ Շաֆաքի կյանքին և գրական գործունեությանն անդրադարձած դեսպանը շեշտել է, որ Հայոց ցեղասպանության թեմայով հեղինակի «Հայրը և ապօրինի» (“Baba ve Piç”) զավակը վեպը միայն Ֆրանսիայում100 հազար ընթերցող է ունեցել, և հավելել. «Թրքությանը վիրավորելու մեղադրանքով Ձեր դեմ դատական գործ էր հարուցվել Թուրքիայում, քանի որ այս վեպում հատվածներ կային Հայոց ցեղասպանությունը մոռացության չմատնելու մասին: Փառք Աստծո, որ Թուրքիայում հրաժարվեցին այդ դատավարությունից: Բայց և այնպես, տեղյակ եմ, որ Ձեր կյանքում եղած այդ փորձը խորն ազդեցություն է թողել Ձեզ վրա: Հրաշալի է, որ Ձեր անցկացրած այդ դժվարին ժամանակները չեն կոտրել թուրք հասարակության ենթագիտակցության վրա ներգործելուն ուղղված աշխատանքները շարունակելու Ձեր խիզախությունը»:

Մրցանակն ստանալուց հետո ելույթ ունեցած Էլիֆ Շաֆաքը նշել է. «Երբ մրցանակն ստացա, ինձ թվում էր, թե նամակ եմ ստացել մի ընթերցողից: Այս մրցանակը ևս, ընթերցողներիս կողմից ստացված նամակների և մյուս մրցանակներիս նման, էներգիայով լցրեց միտքս ու հոգիս»:

Akunq.net