Հայոց ցեղասպանության ժխտումը անօրինական համարելու առաջարկ Գերմանիայում

Շուրջ 157 հազար գերմանացիներ ցանկանում են, որ Գերմանիան Հայոց ցեղասպանությունը ժխտելը անօրինական համարող օրենք ընդունի: Այս մասին հաղորդում է Reuters լրատվական գործակալությունը:

Լուրը ընդհանուր առմամբ ինտերնետում, օնլայն պլատֆորմում գերմանացիների ցուցաբերած նախաձեռնությունների մասին է: Նշվում է, որ Գերմանիայի կանցլեր Անգելա Մերկելը իր ժամանակի թերեւս մեծ մասը հատկացում է եվրոյի գոտու ճգնաժամը լուծելու վրա, բայց շատ քաղաքացիներ ավելի հրատապ են համարում, օրինակ, բնապահպանական, կենդանիների պաշտպանության, թեթեւ թմրանյութերի օգտագործումը թույլատրելու, մահմեդականությունը քննադատող քննակումներ կազմակերպելու, ինչպես նաեւ պատմական իրադարձությունները վերանայելու հարցերը:

Այս տարաբնույթ խնդիրների օնլայն քվեարկություններում, հարցումներում  ամենաշատ աջակիցները ունի Հայկական հարցը, ընդգծում է Reuters-ը: Մոտավորապես 157 հազար գերմանացիներ ասել են, թե ցանկանում են` Գերմանիան օրենք ընդունի, որն անօրինական կհամարի Հայոց ցեղասպանության ժխտումը, գրեթե մեկ դար առաջ Օսմանյան կայսրությունում տեղի ունեցած հայերի զանգվածային սպանությունները որպես ցեղասպանություն ճանաչելու հերքումները համարվեն անօրինական:

Այսպիսի շարժումը, որը Ֆրանսիան արդեն փորձել է, շատ վատ կանդրադառնա Թուրքիայի հետ հարաբերությունների վրա, որը Գերմանիայի առանցքային առեւտրական գործընկերն է, նշում է Reuters-ը։

Գործակալությունը հուլիսի 4-ով թվագրված հաղորդագրությունում հայտնում է նաեւ, որ այս շաբաթվա ընթացքում հարցման որոշ մասնակիցների հետ քննարկման ժամանակ Գերմանիայի կանցլեր Անգելա Մերկելը մերժել է այս  առաջարկը:

Օնլայն հարցումը կառավարության նախաձեռնությունն է` «Երկխոսություն ապագայի շուրջ», որի նպատակն է տեսնել, թե սովորական գերմանացիները ինչ են մտածում` ինչպես կարելի է բարելավել կյանքը Գերմանիայում։

Հրաչ Մելքումյան

http://www.azatutyun.am/content/article/24637199.html