Հաքյարիի Յուքսեքովա գավառում գտնվող եկեղեցին, որը դարեր առաջ կառուցվել է այստեղ բնակված հայերի կողմից, վերականգնման կարիք է զգում:
Այդ մասին հաղորդում է թուրքական «Իհլաս» լրատվական գործակալությունը:
Աղբյուրի փոխանցմամբ` Իրանին սահմանակից Յեդիվերեն դաշտավայրում գտնվող սույն պատմական եկեղեցին դեռ կանգուն է` չնայած ժամանակի ընթացքում կրած վնասներին: Գյուղի բնակիչներից Մեհմեդ Յեմենը հետևյալն է հայտնել «Իհլաս» գործակալությանը. «Արդեն քանի տարի է, ինչ մենք ենք պահպանում մեր գյուղի հենց մեջտեղում գտնվող այս եկեղեցին: Մենք աշխատում ենք այն պահպանել` մեր հնարավորությունների շրջանակներում, սակայն դա բավարար չէ: Պահանջում ենք, որ իրավասուները վերականգնեն այս եկեղեցին»:
Յեմենը նշելով, թե Յեդիվերեն գյուղում գտնվող այս եկեղեցին կառուցվել է այն ժամանակաշրջանում, երբ այստեղ հայեր էին ապրում, հետևյալ տեղեկություններն է հաղորդել սույն պատմական եկեղեցու վերաբերյալ. «Եկեղեցու մասերը պահպանել են իրենց նախկին տեսքը: Տանիքը և պատերը կանգուն են: Մինչ օրս միայն մեկ անգամ են զբոսաշրջիկներ այցելել` եկեղեցին տեսնելու: Եթե, ինչպես հարկն է, եկեղեցին վերականգնվի և ներկայացվի հանրությանը, համոզված ենք` այն ավելի հրապուրիչ կդառնա զբոսաշրջության համար»:
Akunq.net
Leave a Reply