Հրանտ Դինքի սպանությունը կազմակերպողի թիրախում նաև Օրհան Փամուքն էր

Ստամբուլի հայկական «Ակօս» շաբաթաթերթի նախկին գլխավոր խմբագիր Հրանտ Դինքի սպանության կազմակերպման մեղադրանքով ցմահ ազատազրկված Յասին Հայալը խոստովանել է, որ Հրանտ Դինքին սպանելուց հետո նախատեսված էր սպանել նաեւ թուրք հայտնի գրող, Նոբելյան մրցանակ ստացած Օրհան Փամուքին:

Թուրքական Taraf-ի հետ զրույցում Յասին Հայալը պարզաբանել է, թե ինչու էր Դինքին սպանելուց հետո դատարանում հայտարարել թե, լավ կլինի, որ Օրհան Փամուքը խելքը գլուխը հավաքի: Յասին Հայալը նշել է, թե Էրհան Թունջելն իրեն ասում էր, թե Թուրքիայի համար վտանգավոր երկու մարդ կա՝ Հրանտ Դինքն ու Օրհան Փամուքը:

«Դինքի սպանությունը մեծ աղմուկ բարձրացրեց, որի հետեւանքով հրաժարվեցինք Օրհան Փամուքին սպանելու մտքից: Շատ եմ զղջում, որ նման բան էինք նախատեսում: Այդ ամենի մեղավորը երիտասարդությունն ու անտեղյակությունն էր: Մի օր ուզում եմ այցելել իրեն՝ համբուրել ձեռքը եւ ներողություն խնդրել: Էրհան Թունջելն ինձ ասել էր, թե Օրհան Փամուքին Նոբելյան մրցանակ են տվել, քանի որ հայտարարել է, թե թուրքերը մեկ միլիոն հայ եւ մի քանի հարյուրհազար քուրդ են կոտորել»,-ասել է Յասին Հայալը:

Նշենք, որ հունվարի 17-ին թուրքական դատարանը Դինքի սպանության գործում Յասին Հայալին մեղավոր ճանաչեց սպանությունը ծրագրավորելու եւ կազմակերպելու մեղադրանքով եւ դատապարտեց ցմահ ազատազրկման։ Սպանության ուղղորդողներից Էրհան Թունջելը Դինքի սպանության գործով անմեղ ճանաչվեց եւ դատապարտվեց 10 տարի 6 ամիս պատժաչափի՝ Mc Donald’s-ի պայթյունի համար։ Սակայն դատարանը նրան ազատ արձակման որոշում է կայացրել` հաշվի առնելով, որ նա այսքան ժամանակ գտնվել է կալանքի տակ: Համապատասխան գործընթացից հետո Էրհան Թունջելը ազատ է արձակվել:

http://hayeli.am