Արեւելագետներն ավարտական դիպլոմներն ստացան Աղթամարի Սբ. Խաչ եկեղեցում

Յուրաքանչյուր ուսանողի համար նշանակալի իրադարձություն է բուհն ավարտելը, սակայն Երևանի պետական համալսարանի Արևելագիտության ֆակուլտետի ուսանողների համար սա վերածվել էր կրկնակի տոնի, քանի որ նրանք երջանկություն ունեցան իրենց ավարտական դիպլոմներն ստանալ Արևմտյան Հայաստանում:

Ինչպես հաղորդում է «Արմենպրես»-ը` սա առաջին նմանօրինակ դեպքն էր Արևելագիտության ֆակուլտետի ողջ պատմության ընթացքում: Հանձնման արարողությունը տեղի ունեցավ Վանա լճի Աղթամար կղզու Սուրբ Խաչ եկեղեցու բակում: Դիպլոմները հանձնելուց առաջ ուսանողներին շնորհավորեց և իր բարեմաղթանքները հնչեցրեց ԵՊՀ Արևելագիտության ֆակուլտետի դեկանի տեղակալ, թուրքագետ Ռուբեն Մելքոնյանը: Նա հույս հայտնեց, որ ԵՊՀ շրջանավարտները, տեսնելով Վանը և պատմական Հայաստանի մյուս վայրերը, կկարողանան արժևորել ներկայիս Հայաստանը:

«Տեսնելով Վանա լիճը` պետք է գնահատել և սիրել Սևանը, տեսնելով Կարսը` պետք է փայփայել Գյումրին: Յուրաքանչյուրս պետք է նպաստի Հայաստանի զարգացմանն ու ծաղկմանը. զինվորը բանակում` զենքով, գյուղացին իր գյուղում` բահը ձեռքին, իսկ ուսանողը` իր գիտելիքներով»,- իր խոսքում ասաց Մելքոնյանը:

Ելույթից հետո տեղի ունեցավ դիպլոմների հանձնման պաշտոնական արարողությունը, ինչից հետո ԵՊՀ շրջանավարտները շրջեցին կղզում, հայրենասիրական երգեր կատարեցին եկեղեցու բակում:

Եռօրյա ուղևորությունից` Կարս, Անի, Իգդիր, Բայազետ, Վան այցելելուց հետո արդեն նախկին ուսանողները վերադարձան Հայաստան` լի տպավորություններով ու հիշողություններով, ինչպես նաև հույսով` մեկ օր այցելել պատմական Հայաստան արդեն ոչ հյուրի կարգավիճակով:

http://armenpress.am/arm/news/686502/arevelagetnern-avartakan-diplomnern-stacan-axtamari-sb.html