Ֆրանսիայի հետ նոր էջ բացելը Թուրքիայի համար հեշտ չի լինի. Մեհմեդ Ալի Բիրանդ

Թուրք քաղաքական վերլուծաբան Մեհմեդ Ալի Բիրանդը գտնում է, որ Թուրքիայի համար բոլորովին էլ հեշտ չի լինելու նախկին նախագահ Նիկոլա Սարկոզիի օրոք Հայոց ցեղասպանության ժխտումը քրեականացնող օրինագծի ընդունման պատճառով փչացած հարաբերությունները վերականգնելու համար Ֆրանսիայի նոր իշխանության հետ նոր էջ բացելու գործում: Այս մասին, ինչպես հաղորդում է «Արմենպրես»–ը, Բիրանդը հայտնում է թուրքական «Միլիեթ» թերթում հրապարակած հոդվածում:

«Ֆրանսուա Օլանդի` Ֆրանսիայի նախագահ ընտրվելուց անմիջապես հետո Թուրքիայի վարչապետ Թայիբ Էրդողանն ու նախագահ Աբդուլլա Գյուլը հայտարարեցին, որ նոր էջ են բացում Փարիզի հետո հարաբերություններում: Թուրքիայի ղեկավարները գտնում են, որ Թուրքիայի` Եվրոպայում տեղի հարցում Օլանդը Սարկոզիի նման չի մտածում եւ պաշտպանում է թուրք-ֆրանսիական հարաբերությունների զարգացումը: Օլանդը դեմ չէ նաեւ երկարաժամկետ հեռանկարում Թուրքիայի` Եվրամիությանը լիիրավ անդամակցությանը: Օլանդը դեռեւս հանդես չի եկել Թուրքիային դեմ որեւէ հայտարարությամբ: Սակայն, Օլանդի հետ կապված շատ կարեւոր մի հարց կա: Դա Հայոց ցեղասպանության պնդումն է: Օլանդը երկար տարիներ Հայոց ցեղասպանության իրողությանը հավատացած քաղաքական գործիչ է, եւ թուրք իրավասուների հետ իր հանդիպումներում երբեք չի թաքցրել այդ դիրքորոշումը: Թուրքիայի ղեկավարությունը պետք է նկատի ունենա, որ նոր էջ բացելու ժամանակ այս իրողությունը չպետք է անտեսի, որպեսզի հետո կրկին հայտարարի, թե Ֆրանսիան «դավաճանեց թուրքերին»: 2015 թ. մոտենալու հետ, այս գործն այնքան էլ հեշտ լի լինելու: Այդ ժամանակ Թուրքիան կամ պետք է ձեւացնի, թե ոչինչ էլ չի պատահել, կամ էլ` կրկին վերադառնա նախկին օրերին», -գրում է Բիրանդը:

http://armenpress.am/arm/news/686276/fransiayi-het-nor-ej-bacely-turqiayi-hamar-hesht-chi-lini.html