Հայի նկատմամբ վախը թուրքերի մի մասի մոտ ի ծնե է

Թուրքական TGRT HABER TV տրամաբանությամբ եթե շարժվենք, ապա թուրքական ինքնաթիռն էլ են հայերը կործանել Սիրիայի տարածքում:

Եթե Թուրքիան կամ թուրքական ազգայնականությունը որևէ խնդիր չեն կարողանում լուծել տասնյակ տարիներ, ապա պնդում են, որ դրա ետևում ծպտյալ հայեր են: Թուրքիայի ազգայնականության աչքին ամեն անկյունում ծպտյալ հայեր են երևում ` բանակում, պետական համակարգում, կառավարման տարածքային կառույցներում, թերթերում, քաղաքական ուժերի ղեկավար կազմերում, անգամ սահմանից այն կողմ` Թուրքիայի չորս բոլորը:

Այս վախն այն աստիճանի էր հասել մի պահ, որ անգամ նախագահ Գյուլը ստիպված էր հրապարակավ ապացուցել, որ ինքը ոչ թե հայ է, այլ թուրքմենական «սևագլուխ ոչխարների» ցեղի հետնորդ և օգտագործելով իր նախագահական հնարավորությունը` անգամ փաստաթուղթ ներկայացրեց այս մասին, թեև այդ ցեղն այն ժամանակ գրագրություն չի ունեցել: Սակայն այժմ թուրքական ազգայնականությունը փորձում է քրդական ահաբեկչությունը բարդել հայերի վրա:

TGRT HABER TV հեռուստաընկերության «Թուրքական հարթակ» հեռուստահաղորդմանը հյուր եկած Միլլի Գազետե թերթի թղթակից Մեհմետ Շեվկետ Էյգին հայատարարել է, որ եթե Հյուսիսային Քրդստանում Կանդիլի լեռները (Քրդական աշխատավորական կուսակցության հիմնական բազաները) վերացվեն քարտեզից և հողին հավասարեցվեն, ապա միևնույն է, ահաբեկչությունը չի դադարի:

Իրեն լրագրող համարող այս անձը պնդել է, որ ահաբեկիչները ոչ թե մուսուլման քրդերն են, այլ` ծպտյալ հայերը, որոնք ուզում են այս ճանապարհով Թուրքիան մասնատել և Արևմտյան Հայաստան ստեղծել: Ամեն անգամ, երբ որևէ խնդիր ի վիճակի չի լինում լուծել թուրքական ազգայնականությունը, և դա վիրավորում է «գորշ գայլերի» ոհմակային ինքնասիրությունը` ուրեմն հայերն են արել:

http://www.armweeklynews.am/awn/ma12/am_1282.htm