Թուրքիոյ Պաթման նահանգի Քոզլուք շրջանին մէջ ծառայութեան ընթացքին սպաննուած հայազգի զինծառայող Սեւակ Շահին Պալըքճըի սպանութեան գործով հերթական դատական նիստը տեղի ունեցած է:
Սեւակի սպանութեան օրը նոյն զօրամասին մէջ ծառայութիւն իրականացնող սպային դէմ գործ յարուցուած է: Ան կը մեղադրուէր պաշտօնական անփթութեան եւ դիրքը չարաշահելու համար: Դատական այս գործը պիտի կցուի Սեւակի սպանութեան գործով դատավարութեան:
Նիստի ընթացքին ցուցադրուած է 24 Ապրիլ 2011-ին Քըվանչ Աղաօղլուի արձակած գնդակէն սպաննուած Սեւակ Շահին Պալըքճըի` սպանութեան օրը կրած հագուստը եւ պահանջ ներկայացուցած է արիւնոտ հագուստը փորձաքննութեան ուղարկելու:
Դատարանին մէջ արիւնոտ հագուստին ցուցադրումը յուզած է Սեւակին ծնողները:
«Մէկ վայրկեանին մէջ մեր կեանքը ամբողջութեամբ փոխուեցաւ, սակայն կասկածեալը գոնէ վայրկեան մը բանտ չյայտնուեցաւ: Մեր օրերուն, երբ անվճար կրթութեան իրաւունք պահանջողները կը բանտարկուին, մարդասպանը հանգիստ կը շրջի ազատութեան մէջ, ծով կ’երթայ, իսկ ես տղայիս գերեզմանը կը խնամեմ: Ես կ’ուզեմ, որ օրէնքի գերակայութիւնը յաղթէ, եւ ուժը չազդէ օրէնքին վրայ»,- ըսած է Անի Պալըքճը:
Leave a Reply