Թուրք նախարարին մեղադրել են հակահայկական բովանդակությամբ գրքի հրատարկման համար

Թուրքիայում չեն դադարում հայերի նկատմամբ ատելություն սերմանող «Այս փաստաթուղթը վերցնում եմ» գրքի վերաբերյալ խոսակցությունները: Ստամբուլի ընդդիմադիր Ժողովրդահանրապետական կուսակցության անդամ Քադիր Գյոքմենը մեղադրել է Թուրքիայի Ազգային կրթության նախարարությանը` Յունուս Զեյրեքի հեղինակած  գրքի միջոցով հայերի հանդեպ ատելություն սերմանելու համար: Ինչպես հաղորդում է «Արմենպրես»-ը` վկայակոչելով «Ակօս» պարբերականը, թուրք պատգամավորը մեղադրել է կրթության նախարար Օմեր Դինչերին` այս գքրի մասին իմանալու և դրա դեմ  քայլեր չձեռնարկելու համար:

Ի պատասխան  մեղադրանքների` թուրք նախարարը հայտարարել է, որ գրքի հրատարկմամբ իրենք ամենևին էլ մտադիր չեն եղել որևէ մեկին թիրախի դարձնելու: Գրքում տեղ գտած արտահայտությունները նա որակել է «երգիծական ոճի քննադատություն»` ընդդեմ Հայոց ցեղասպանության շուրջ քննարկումների:

Ստամբուլի դպրոցներում երեխաներին անվճար բաժանված «Այս փաստաթուղթը վերցնում եմ» գրքում տեղ էին գտել հայերի նկատմամբ վիրավորական արտահայտություններ, մասնավորապես` «Նման հարևանը թշնամի է», «Մի դավաճանության անատոմիա»: Գրքի հեղինակներն անվանակել էին նաեւ նախօրեին Թուրքիայում անցկացված «Հայերից ներողություն եմ խնդրում» շարժման մասնակիցներին` նրանց կոչելով «Մեր միջի սատանան», «անազգ», «անարյուն»:  

http://armenpress.am/arm/news/686057/turq-nakhararin-mexadrel-en-hakahaykakan-bovandakutyamb.html