Թուրքերն իրենց բնիկներ լինելու նոր վարկած են հորինել

Թուրքերը տարածաշրջանում իրենց բնիկ լինելու նոր «հայտնագործություն» են արել: Թուրք գիտնականները շրջանառության մեջ են դրել մի վարկած, ըստ որի` թեև իրենց նախահայրերը Միջին Ասիայից են, սակայն իրենց հայրենիքն իբր Մերձավոր Արեւելքն է: Այս մասին, ինչպես հաղորդում է «Արմենպրես»–ը, թուրքական TRT հեռուստաալիքին տված հարցազրույցում հայտարարել է Էգե համալսարանի Թուրքական աշխարհի հետազոտական ինստիտուտի մասնագետ Օսման Քարաթայը:

«Գիտնականի» առաջ քաշած վարկածի համաձայն` թուրքերի նախահայրերը հինգ հազար տարի առաջ Միջին Ասիայից տեղափոխվել են այսպես կոչված Թուրքիստան` Միջագետք եւ արեւմտյան Իրան, որտեղից էլ` Թուրքիայի ներկայիս տարածք:

Նրա խոսքով` թուրքերի նախահայրերը միջինարեւելքցի են, իսկ մայր հայրենիքն ուրիշ է: «Միջին Ասիայից հինգ հազար տարի առաջ եկած թուրքերի նախահայրերն այսօրվա Իրաքի հյուսիսից արտագաղթած Սուբար կոչված ժողովուրդն է, որը տեղի այլ ժողովուրդների հետ հազարավոր տարիների ընթացքում միախառնվել եւ, պահպանելով լեզուն, կազմավորել է այսօրվա թուրք ժողովուրդը: Դա պետք է տարբերակել հետեւյալ կերպ, այսինքն` թուրքերի հայրերը Միջին Արեւելքից են, իսկ հայրենիքը Միջին Արեւելքը չէ», -ասել է նա:

Թուրք «գիտնականն» իր այդ «հայտնագործությունը» հիմնավորել է շումերական գրություններում «թուրքերենին նման բառերի առկայությամբ»: «Նախնադարում Միջագետքի եւ Զագրոսի արեւմտյան Իրանի տարածաշրջանի ժողովուրդները խոսում էին կցական լեզուներով: Այսինքն` բառարմատը նույնն էր, իսկ վերջավորությունները տարբեր: Վերջին 20 տարիների ընթացքում Մերձավոր Արեւելքում եւ Կովկասում հայտնաբերված հնագիտական նյութերի միջեւ կապ է ի հայտ եկել: Այդ նյութերի ժամանակագրական հետազոտությունից երեւում է, որ Միջին Արեւելքից դեպի հյուսիս շարունակական շարժ է եղել, որը շարունակվել է հազարավոր տարիներ», -ասել է Քարաթայը:

TRT-ն հայտնում է, որ Քարաթայի պնդումները պատմության բնագավառում նոր քննարկումների պատճառ կարող են դառնալ:

http://armenpress.am/arm/news/685987/turqern-irenc-bnikner-linelu-nor-varkats-en-horinel.html