Արքեպիսկոպոս Աթեշյանն այցելել է Սիվրիհիսարի հայկական եկեղեցին

Պոլսո հայոց պատրիարքի փոխանորդ արքեպիսկոպոս Արամ Աթեշյանն այցելել է Էսքիշեհիրի Սիվրիհիսար գավառում գտնվող Սուրբ Երրորդություն հայկական եկեղեցին, որն իր մեծությամբ երկրորդ հայկական եկեղեցին է Անատոլիայում:

Այդ մասին հաղորդում է «Ջիհան» լրատվական գործակալությունը:

Աթեշյանը եկեղեցի այցից առաջ Պոլսահայերի հոգևոր խորհրդի անդամների հետ միասին հյուրընկալվել է Սիվրիհիսարի քաղաքապետ Չեթին Քավասի գրասենյակում:

Թուրքիայի մշակույթի և զբոսաշրջության նախարարության կողմից սկսված Սուրբ Երրորդություն եկեղեցու վերականգնողական աշխատանքները շուտով ավարտին կհասցվեն: Նախկինում որպես գոմաղբի պահեստ օգտագործված սույն եկեղեցու մի հատվածում էլ պահվել էին քաղաքապետարանին պատկանող գեներատորներ, որի համար էլ հայկական համայնքը տարիների շարունակ բողոքներ էր հղել: Այդ բողոքների հիման վրա սկսված վերականգնողական աշխատանքների 95 տոկոսն ավարտվել է: Նախատեսվում է, որ եկեղեցին առաջիկա ամիսներին կբացվի զբոսաշրջիկների առջև:

Արքեպիսկոպոս Աթեշյանը նշելով, որ իրենք գոհ են եկեղեցու վերականգնման աշխատանքներից, իր երախտագիտությունն է հայտնել Թուրքիայի մշակույթի և զբոսաշրջության նախարարությանը և Սիվրիհիսարի քաղաքապետարանին: Արամ Աթեշյանն ասել է. «Եթե նախարարությունը թույլ տա, ծրագրում ենք սույն եկեղեցում պատարագներ մատուցել: Մենք աշխատանքներ ենք տանում այդ ուղղությամբ»:

Աթեշյանն ընդգծել է, որ թույլտվություն ստանալու դեպքում իրենք ուզում են տարեկան մի քանի անգամ պատարագ մատուցել այս եկեղեցում:

Akunq.net