Տոլման ամենահայկական կերակրատեսակն է. Վահե Անթանեսյան

«Հուլիսի 11-ին Սարդարապատում ժամը 18.00-ին, արդեն երկրորդ անգամ, նշվելու է Տոլմայի համահայկական փառատոնը: Փառատոնն ունի մեկ գերնպատակ` վերականգնել ու տոլմայի նոր տարատեսակներ ի հայտ բերել, ինչպես նաև ժողովրդին հիշեցնել, որ ինչքան ավանդական կերակրատեսակներով սնվենք, այնքան առողջ կլինենք»,-այսօր լրագրողների հետ հանդիպման ժամանակ ասաց «Հայ խոհարարական ավանդույթների զարգացման ու պահպանման» ՀԿ նախագահ Սեդրակ Մամուլյանը:

Մամուլյանի խոսքով` տոլմայի շատ կերակրատեսակներ կան. «Հիմքը տոլի բառն է, որը նշանակում է խաղողի վազ: Տոլմայի հիմքը խաղողի թփով և ծեծված մսով, բլղուրով տոլման է, դրանից էլ առաջացել են մյուս տարատեսակները»:

Ասուլիսին ներկա «Ոսկե Ծիրան» կինոփառատոնի միջոցառումների կազմակերպիչ Վարդան Հակոբյանն էլ ասաց, որ «Ոսկե Ծիրանի» շրջանակներում ամեն տարի շուրջ 200 արտասահմանցի հյուրեր են ունենում, ովքեր ցանկանում են ծանոթանալ հայկական մշակույթին. «Երկրի մշակույթին ծանոթանալու ձևերից մեկն էլ խոհանոցն է: Անցած տարի հյուրերը Տոլմայի փառատոնից մեծ տպավորություններով հեռացան, կարծում եմ, համագործակցությունը կշարունակվի»:

«Հայ խոհարարական ավանդույթների զարգացման ու պահպանման» ՀԿ քարտուղար Վահե Անթանեսյանը նշեց, որ այս տարվա տոլմայի փառատոնին արդեն ունեն 30 հայտ, մինչդեռ անցած տարի տաղավարների թիվը 22-ն էր. «Ցավոք, տաղավարների քանակը սահմանափակ է: Անցած տարի ներկայացվել էր տոլմայի 60 տարատեսակ, կարծում եմ, այս տարի ավելի շատ տարատեսակներ կներկայացվեն»:

Անթանեսյանի կարծիքով` փառատոնը հնարավորություն է տալիս տոլման օտարումից փրկել. «Մեր արևելյան հարևանները շատ հայտարարություններ են անում, թե իբր հայերը տոլման գողացել են իրենցից: Բացի դրանից, մենք մեր ներսում հաղթահարելու բաներ ունենք. մեկն այն է, որ տոլման արտասանում ենք թուրքերեն` դոլմա: Ուզում եմ ասել, որ տոլման ամենահայկական կերակրատեսակն է»:

Սեդրակ Մամուլյանն էլ հավելեց, որ խոհանոցն այսօր վերածվել է զենքի մի տեսակի, որից մեր հարևանները կարողանում են լավ օգտնվել. «Պատահական չէ, որ փառատոնը Սարդարապատում ենք անցկացնում, փառատոնն էլ պայքարի մի միջոց է»:

Հավելենք, որ Տոլմայի փառատոնի հաղթողը կստանա կավից գավաթ. կլինեն նաև չորս` համահոտային հատկանիշներով, նորարությամբ, տեսքով աչքի ընկած տաղավարների և «լավագույն տաղավար» անվանակարգերը:

http://haynews.am/hy/1340280701