Թուրքիայի Վաքըֆների խորհուրդը որոշել է մի հայկական գերեզմանոց վերադարձնել համայնքին

Թուրքիայի Վաքըֆների գլխավոր վարչությանը կից գործող Վաքըֆների խորհուրդը ազգային փոքրամասնություններին պատկանող 4 անշարժ գույքեր վերադարձնելու որոշում է կայացրել: Այդ մասին հաղորդում են թուրքական լրատվամիջոցները:

Վաքըֆների խորհրդի` 2 շաբաթ առաջ տեղի ունեցած ժողովում քննարկվել է 5737 թվակիր Վաքըֆների օրենքի 11-րդ հոդվածի շրջանակներում ընդունված փոքրամասնությունների վաքըֆների անշարժ գույքերը վերադարձնելու մասին պահանջներ:

Խորհուրդը Ստամբուլի Քադըքյոյ շրջանի Սուրբ Թագավոր հայկական եկեղեցու, Արամյան-Ումջույան դպրոցի և գերեզմանոցի վաքըֆի պահանջով որոշել է վերադարձնել նաև մի հայկական գերեզմանոց:

Ըստ աղբյուրի` 5737 թվակիր Վաքըֆների օրենքի 11-րդ հոդվածի շրջանակներում վաքըֆների` անշարժ գույքերը վերադարձնելու մասին դիմումների ժամկետը դեռ չի լրացել: Հիշյալ օրենքի շրջանակներում մինչ օրս 35 համայնքի վաքըֆներից ստացվել են ընդհանուր 158 անշարժ գույքերի վերադարձի մասին դիմումներ:

Akunq.net