Ջոն Էվանսը հանդես է եկել Հայոց ցեղասպանության մասին գրքերի վերլուծականով

«American Dipolmacy» էլէկտրոնային ամսագիրը հրապարակել է Հայաստանի Հանրապետությունում ԱՄՆ-ի նախկին դեսպան Ջոն Էվանսի վերլուծությունը` թուրք գիտնական Թաներ Աքչամի եւ ամերիկահայ ճանաչված գիտնական Վահագն Դադրյանի գրքերի վերաբերյալ: Ինչպես տեղեկացնում է «Արմենպրես»-ը` Էվանսը վերլուծությունում մասնավորապես գրել է. «Թաներ Աքչամի «Մարդկության դեմ երիտթուրքերի հանցագործությունը. Հայոց ցեղասպանությունը եւ էթնիկ զտումները Օսմանյան կայսրությունում» եւ Վահագն Դադրյանի եւ Թաներ Աքչամի «Դատավարություն Ստամբուլում. Դատավարություններ Հայոց ցեղասպանության գործով» գրքերը Հայոց ցեղասպանության մասին ամենաավարտուն գրքերն են այն բազմաթիվ գրքերից, որոնք ես կարդացել եմ: Այս երկու գրքերը Հայոց ցեղասպանության ուսումնասիրություններով զբաղվողների համար են, սակայն Աքչամի «Մարդկության դեմ երիտթուրքերի հանցագործությունը. Հայոց ցեղասպանությունը եւ էթնիկ զտումները Օսմանյան կայսրությունում» աշխատանքը նաեւ ընթերցողների համար է լավագույն ձեռքբերում: Համալսարանների գրադարանները երկու գրքերն էլ ձգտում են ունենալ»:

Էվանսը վերլուծությունում հիշեցնում է, որ Քլարկ համալսարանի պատմաբան Աքչամն առաջին թուրք գիտնականն է, ով հրապարակայնորեն ճանաչել է հայերի ցեղասպանությունը: «Լինելով լրագրող Հրանտ Դինքի մտերիմ ընկերը` Աքչամին եւս բազմիցս սպառնացել են, սակայն դա չի խանգարել գիտնականին շարունակել փորփրել Օսմանյան արխիվները` հետազոտություններ իրականացնելու համար»,-գրում է Էվանսը:

«Սարսափելի ճշմարտությունը, որին կարելի է հանգել Աքչամի գրքից, այն է, որ թուրքերը ոչ այնքան ատել են հայերին, որքան նրանց դիտարկել են որպես մրցակիցներ` Օսմանյան կայսրության ավերակների վրա նոր պետություն կառուցելու գործում: Սա չի մեղմում իրականացված հանցագործությունները` բռնաբարություն, սպանություն, բռնի ձուլում, ինչպես նաեւ հողի եւ ունեցվածքի զրկում, կարճ ասած` Ցեղասպանություն»,-եզրափակում է նախկին դեսպանը:

http://armenpress.am/arm/news/685463/former-us-ambassador-to-armenia-john-evans-made-analysis-on-armenian-genocide-books.html