Թուրքիայում «թյուրիմացաբար ապամոնտաժված» հայկական մատուռը կվերակառուցվի

Թուրքիայի Մալաթիայի մարզի հայկական գերեզմանատան մատուռն ապամոնտաժվել է «թյուրիմացաբար» և հիմա թուրքական կառավարությունը վերակառուցելու է այն:

Ինչպես տեղեկացնում է Haberler կայքը, փետրվարի 2-ին քանդված մատուռի վերակառուցման աշխատանքները շուտով կսկսվեն:

Մատուռի քանդումը քաղաքապետարանի կողմից մեծ աղմուկ էր բարձրացրել Թուրքիայի հայ համայնքի և քաղաքացիական հասարակության շրջանում: Որպես նոր վերանորոգված մատուռի քանդման պատճառ նշվել էր այն, որ թաղամասի թուրք բնակիչները բողոքել էին հայկական եկեղեցու կառուցման դեմ:

Մալաթիայի քաղաքապետ Ահմեթ Չաքըրը տեղեկացրել է, որ տեղի ունեցածը թյուրիմացություն է եղել: Հայ համայնքի կողմից քաղաքապետարան ներկայացրած նախագծում նշված է եղել, որ շինությունը պետք է ունենա 6 մետր բարձրություն, սակայն երբ այն կառուցվել է 7.5 մետր բարձրությամբ, քաղաքապետարանը ցանկացել է ապամոնտաժել «ավելորդ» հատվածը: Բայց ապամոնտաժող բրիգադը «սխալ է հասկացել» հանձնարարությունը և «թյուրիմացաբար» քանդել ողջ շինությունը:

Լրատվամիջոցներում բարձրացած աղմուկից հետո Թուրքիայի վարչապետ Ռեջեփ Թայիփ Էրդողանը հրահանգել է վերակառուցել շինությունը:

«Վարչապետի հրահանգը կատարելու ենք: Շինարարությունը շուտով կսկսվի, իսկ արդեն վերակառուցված մատուռը կհանձնվի մեր հայազգի քաղաքացիներին»,- ասել է Ահմեթ Չաքըրը:

http://tert.am/am/news/2012/06/20/malatia/