Թուրքիայի տարրական դպրոցների ութերորդ դասարանի աշակերտների համար կազմակերպված քննության հարցերից մեկում տեղ գտած այն կետը, թե «Հույներն ու հայերը համագործակցել են զավթիչների հետ», «ցեղապաշտության» և «խտրականության» մեղադրանքով դատական գործի հարուցման տեղիք է տվել:
Այդ մասին հաղորդում է թուրքական «Թարաֆ» օրաթերթը:
Այդ հարցը հետևյալ ձևակերպումն է ունեցել. «Մուդրոսի զինադադարի կնքումից հետո մեր երկրի գրավմանն ի պատասխան Ստամբուլի կառավարությունը լուռ և անտարբեր մնաց: Դարեր շարունակ թուրքերի հետ միասին խաղաղ և ապահով կյանք վարած որոշ հույներ ու հայեր ևս համագործակցեցին զավթիչների հետ: Թուրք ազգը ի՞նչ հակազդեցություն է ցուցաբերել այդ դրությանը դեմ-հանդիման»:
Վիճաբանության տեղիք տված վերոնշյալ հարցի կապակցությամբ դոկտոր Սերդար Քայան Թուրքիայի ազգային կրթության նախարարության դեմ դատական գործ է հարուցել Սկյուտարի արդարադատության ատյանում: Քայան իր հայցում նշել է. «Քննությանը մասնակցած դստերս հարցաշարի` սոցիալական գիտությունների բաժնի երկրորդ կետում տրվել է հայերին և հույներին որպես դավաճան բնորոշող մի հարց: Նման հարցի ընդգրկումը հանցագործություն է»:
Սերդար Քայան «Թարաֆ»-ին հայտնել է. «Աղջիկս քննության ժամանակ այդ հարցի առաջ գրել է` «ճիշտ է»: Նշանակում է` աղջկաս մեջ էլ են խտրականություն ներարկել»:
Akunq.net
Leave a Reply