Հրանտ Դինքին սպանած Օգյուն Սամասթին բանտում այցելել են Թուրքիայի ընդդիմադիր Ժողովրդահանրապետական կուսակցության ներկայացուցիչները: Սամասթը նրանց պատմել է Դինքի սպանության մանրամասների, ինչպես նաև` իր զգացողությունների մասին:
Նա դարձյալ պնդել է, որ իրեն դրդել են սպանության` Հրանտ Դինքի և հայերի մասին բացասական բաներ պատմելով:
«Յասին Հայալը սպանությունից 6 ամիս առաջ ինձ ասաց, որ սպանեմ: 5 ամիս փախա, սակայն վերջում 5-6 օր շարունակ ինձ «սրսկել» են»,- պատմել է նա:
Ինչպես տեղեկացնում է թուրքական «Vatan»-ը, 5.5 տարի բանտում գտնվող Սամասթը որևէ առողջական կամ ֆինանսական խնդիր չունի, իսկ պատժախուցը կիսում է ևս երկու դատապարտյալների հետ:
Նա պատմել է, որ բանտում ժամանակն ընթերցանությամբ է անցկացնում:
«Տոլստոյ եմ կարդում: Ուզում եմ համալսարանում սովորել, իրավաբան դառնալ եմ ուզում»,-ասել է նա:
Սամասթը նաև պատմել է, որ իր դատավճռից հետո այլևս նամազ չի անում. հրաժարվել է աղոթելուց:
Անդրադառնալով Դինքի սպանության մասին հարցերին` ասել է, որ եթե այժմյան խելքն ունենար, երբեք չէր սպանի.
«Ստամբուլ գալուցս հետո նախ քեռուս տուն գնացի, նրան հարցրի, թե ինչպես կարող եմ Շիշլի գնալ: «Ակօս»-ի տեղն էլ չգիտեի: Երբ հասա, արդեն մտափոխվել էի, չէի ցանկանում սպանել: Մտա մոտակա ինտերնետ-սրճարանը և 2-3 ժամ նստեցի: Հետո զանգեցի Յասինին և ասացի, որ այնտեղ անվտանգության ծառայողներ կան, չեմ կարող սպանել: Նա էլ ասաց, որ նրանց էլ սպանեմ: Իրականում խաբել էի նրան, ոչ մի թիկնապահ էլ չկար, ես մտափոխվել էի, դրա համար խաբեցի: Աստիճաններին նստած էի, երբ Հրանտն անցավ: Ամեն ինչ մի ակնթարթում եղավ: Դրանից հետո տեղի ունեցածը չեմ հիշում: Ավտոբուս նստեցի: Ես սպանել չէի ուզում, բայց երբ մեկ անգամից առջևս տեսա…»,-պատմել է նա:
Սամասթը ազդվել է, երբ լսել է Դինքի այրու` Ռաքել դինքի ելույթն իր մասին: «Նա երեխա էր: Առանց երեխայից մարդասպան դարձնող խավարը պարզելու` ոչինչ անել չի լինի»,- Սամասթի մասին ասել էր Ռաքել Դինքը:
«Հրանտ Դինքի մասին գրքերը կարդալուց հետո զղջացի. հատկապես Նեդիմ Շեների գիրքը: Ես դատարանում անկեղծ էի, ամեն ինչ պատմեցի, սակայն որևէ վերաբերմունք, պատժամիջոցի թեթևացում չստացա»,- ասել է նա:
Leave a Reply