Կեսարիայում ժամանակի հարուստ հայերից Գյուլբենկյանի ապարանքը Նեջիփ Դինչերի կողմից կվերածվի փոքրիկ հյուրանոցի: Դինչերը որոշել է պահպանել ապարանքի նախկին տեսքը:
Թուրքական «Սաբահ» օրաթերթի համաձայն` կեսարացի գործարար Նեջիփ Դինչերը Թալասում գտնվող այս ապարանքը գնել է 6 տարի առաջ: Պոլսահայ համայնքի ներկայացուցիչ, ճանաչված ճարտարապետ Գևորգ Օզքարագյոզը «Սաբահ»-ին հայտնել է. «Այս շրջանում տասնյակ ապարանքներ են ավիրվել: Եթե նման մի կառույց կարող է պահպանվել, դրանից մեծապես կշահի մեր պատմությունը»:
1800-ականներին կառուցված սույն երկհարկանի ապարանքի վերին հարկը քանդված վիճակում է: Դինչերը «Սաբահ»-ին տված հարցազրույցում նշել է. «Ապարանքը Գյուլբենկյաններից հետո բազմիցս փոխանցվել է տարբեր մարդկանց: Ես այն գնել եմ Ստամբուլում մի բժշկից, որն այն օգտագործում էր որպես ամառանոց»:
Դինչերն ընդգծելով, թե իրենք ապարանքը հյուրանոցի են վերածելու` առանց նախկին տեսքը խաթարելու, հայտնել է նաև, որ մեկ տարի առաջ տան ինքնարժեքը հաշվարկվել է 900 հազար թուրքական լիրա: Դինչերը շեշտելով, թե Թալասում զբոսաշրջիկների համար ոչ մի հյուրանոց չկա, ասել է. «Հյուրանոցի անունն էլ «Գյուբենկյան» ենք դնելու»:
Akunq.net
Leave a Reply