Մորնինգսթարի` Հին Ջուղայի հայկական գերեզմանոցով հետաքրքրվելն անհանգստացրել է Ադրբեջանի իշխանություններին

Ադրբեջանում ԱՄՆ դեսպանի պաշտոնի թեկնածու Ռիչարդ Մորնինգսթարի` Սենատի արտաքին հարաբերությունների հանձնաժողովում տեղի ունեցած լսումների ժամանակ արած հայտարարությունն այն մասին, որ դեսպան նշանակվելու դեպքում իր առաջին գործերից մեկը լինելու է ադրբեջանցիների կողմից ավերված Հին Ջուղայի հայկական գերեզմանոց այցը, անհանգստություն է առաջացրել Ադրբեջանի իշխանության մեջ: «Ես ամեն ջանք գործադրելու եմ, որպեսզի այցելեմ Ջուղայի հայկական գերեզմանոց: Մահացած մարդկանց նկատմամբ նման վիրավորանքը ոչ մի կերպ ընդունելի չէ», -ասել էր նա:

Ինչպես հաղորդում է «Արմենպրես»–ը, «Ազադլըգ» թերթը գրում է, որ Մորնինգսթարի` դեռ պաշտոնավարությունը չսկսած հայկական գերեզմանոցի ավերման մասին խոսելը կասկածներ է արթնացրել Ադրբեջանի իշխանության մոտ: Հարցի հետ կապված Ադրբեջանի խորհրդարանի պատգամավոր, պաշտպանության եւ անվտանգության հարցերով հանձնաժողովի անդամ Զահիդ Օրուջի կարծիք է հայտնել, որ Ադրբեջանը պետք է այդ ուղղությամբ շտապ դիվանագիտական քայլեր կատարի: «Մորնինգսթարի այդ թեզերն անհանգստություն եւ դժգոհություն են առաջացրել Բաքվում: Ադրբեջանում նման մտադրություններով դեսպանի նշանակումը մեզ չի կարող գոհացնել: Մեկնարկման գծում նման փաստարկներով զինված դեսպանի ելույթը կարող է ապագայում սրել հարաբերութունները: Մենք դեռ չենք ազատվել 907-րդ ուղղման փորձանքից: Նախիջեւանում հայկական հետքեր որոնելու Մորնինգսթարի ցանկությունն անընդունելի է», -ասել է ադրբեջանցի պատգամավորը:

ԱՄՆ Սենատի արտաքին հարաբերությոնների հանձնաժողովում լսումների ժամանակ սենատորների հարցերին տված պատասխանում Մորնինգսթարն ասել է, որ Բաքվում իր հնարավոր գործունեության հիմնական սյուները կհանդիսանան մարդու իրավունքները, Լեռնային Ղարաբաղը, էներգետիկայի եւ տարածաշրջանային անվտանգտության հարցերը:

http://armenpress.am/arm/news/684846/morningstari-hin-juxayi-haykakan-gerezmanocov-hetaqrqrveln.html