Թուրքիայում աբխազերենը հնարավոր է` ուսումնասիրվի պետական մակարդակով

Պետական համալսարաններում եւ դպրոցներում քրդերենն ընտրողաբար ուսումնասիրվելու վերաբերյալ Թուրքիայի վարչապետ Ռեջեբ Թայիփ Էրդողանի` օրերս արած հայտարարության կապակցությամբ թուրքական խորհրդարանում քննարկումների ժամանակ այդ երկրի կրթության նախարար Օմեր Դինչերն առաջարկել է թուրքական պետական կրթական հաստատություններում մտցնել թուրքաբնակ ժողովուրդների լեզուների ուսումնասիրման դասաժամեր` այդ թվում նաեւ աբխազերեն: Այս մասին, ինչպես հաղորդում է «Արմենպրես»–ը, հայտնում է թուրքական «Հուրիեթ» թերթը` նշելով, որ խոսքն այդ լեզուների ուսումնասիրման համար դասագրքերի եւ դասավանդման հատուկ ծրագրերի մասին է:

Աբխազական «Ապսնի Պրես» լրատվական գործակալությունը հաղորդել է, որ Աբխազիայի ԱԳՆ Թուրքիայի եւ Մերձավոր Արեւելքի բաժնի աշխատակից Ալիաս Ասաբուան այդ կապակցությամբ հայտնել է, որ թուրքական պետական դպրոցներում եւ համալսարաններում աբխազերենի ուսումնասիրման հարցը վերջին 5 տարիների ընթացքում բազմիցս բարձրացվել է թուրքական խորհրդարանում:

http://armenpress.am/arm/news/684741/turqiayum-abkhazereny-hnaravor-e-usumnasirvi-petakan.html